Праз праверку ВПС і войскаў СПА Беларусі палякі і літоўцы ўзнялі самалёты-выведнікі – Вальфовіч
12 сакавіка, Позірк. Раптоўная праверка Вайскова-паветраных сіл і войскаў супрацьпаветранай абароны “насцярожыла <…> суседзяў — палякаў, літоўцаў”, якія 11 сакавіка “паднялі самалёты-выведнікі на сумежнай тэрыторыі”, заявіў дзяржаўны сакратар Савета бяспекі Аляксандр Вальфовіч.
Паводле яго слоў, якія прыводзіць прэс-служба Міністэрства абароны, для ВПС і войскаў СПА прадугледжаны “шырокі комплекс мерапрыемстваў”. Часці былі раптоўна прыведзеныя ў баявую гатоўнасць, выведзеныя ў адпаведныя пазіцыйныя раёны, вызначаныя камісіяй дзяржсакратарыята Савета бяспекі.
“Гэта праверка здольнасці камандавання Вайскова-паветраных сіл і войскаў супрацьпаветранай абароны кіраваць, прымаць на суправаджэнне цэлі, ставіць задачы на паражэнне, то бок абараняць паветраную прастору нашай краіны”, — патлумачыў Вальфовіч.
Чыноўнік сцвярджае, што “ніякай пагрозы на адрас сумежнага боку” ініцыятары праверкі “не накіроўвалі і не ставілі такую мэту”. Больш за тое, паводле яго слоў, у раёне мяжы “стараліся навучальныя задачы не адпрацоўваць”: “Адпрацоўвалі іх у глыбіні краіны, нават ва ўсходніх рэгіёнах нашай рэспублікі ў большай ступені”.
12 сакавіка правяраныя праводзяць практычныя стрэльбы.
9 сакавіка Вальфовіч паведаміў, што войскі СПА адпрацуюць задачы “ва ўмовах уздзеяння дыверсійна-выведніцкіх груп умоўнага праціўніка”.
Раптоўная праверка боегатоўнасці ўсіх відаў і родаў Узброеных сіл на даручэнне Аляксандра Лукашэнкі праводзіцца з 16 студзеня — у абыход Мінабароны. Мерапрыемствы першапачаткова планавалася праводзіць да вясны, аднак 3 сакавіка яе ініцыятар заявіў, што праверка будзе працягвацца.
Паралельна з 26 студзеня з ініцыятывы Мінабароны праводзіцца “планавая” комплексная праверка боегатоўнасці вайсковых часцей і падраздзяленняў.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Увесь гэты час улады практычна бесперапынна праводзяць вучэнні сілавога блока.
