Расіянін стаў фігурантам крымінальнай справы за спробу ўвозу ў Беларусь траўматычнага пісталета з патронамі

10 сакавіка, Позірк. Распачата крымінальная справа ў дачыненні да грамадзяніна Расіі, які спрабаваў увезці ў Беларусь пісталет з патронамі, паведамляе Дзяржаўны мытны камітэт (ДМК).

Мужчыну абвінавачваюць паводле арт. 333¹ КК (незаконнае перамяшчэнне праз мяжу ЕАЭС або дзяржаўную мяжу Беларусі моцнадзейных, ядавітых, атрутных рэчываў, радыеактыўных матэрыялаў, агнястрэльнай зброі, боепрыпасаў, выбуховых рэчываў, зброі масавага паражэння або ваеннай тэхнікі).

Адзначаецца, што фігурант прыбыў у Беларусь як “кіроўца счэпкі транспартных сродкаў”, ён увозіў па працэдуры мытнага транзіту два дарагія легкавыя аўтамабілі.

Супрацоўнікі Мінскай рэгіянальнай мытні агледзелі счэпку з ужываннем інспекцыйна-дагляднага комплексу і выявілі ў кабіне седлавога цягача “прадметы, падобныя на зараджаны пісталет і патроны”.

Устаноўлена, што расіянін увозіў пісталет “Гроза-021”, які з’яўляецца агнястрэльнай зброяй траўматычнага дзеяння, і патроны да яго.