Дзве крымінальныя справы распачатыя ў дачыненні да беларуса за спробу ўвозу марыхуаны з Літвы

10 сакавіка, Позірк. Дзве крымінальныя справы распачатыя ў дачыненні да грамадзяніна Беларусі, які спрабаваў увезці ў сваім аўтамабілі марыхуану з Літвы, паведамляе Дзяржаўны пагранічны камітэт (ДПК).

Мужчына абвінавачваецца ў “незаконным перамяшчэнні праз мяжу і незаконным абароце наркатычнага сродку”, адзначае ведамства.

Фігурант затрыманы 7 сакавіка ў пункце пропуску Каменны Лог (з літоўскага боку — Мядзінінкай). Ён растлумачыў, што набыў рэчыва ў невядомых асоб у Літве і перавозіў яго “для ўласнага спажывання”.

Паводле даных пагранслужбы, яму пагражае да 7 гадоў пазбаўлення волі.

У 2025 годзе канфіскавана найбольшая за ўсю гісторыю існавання мытні Беларусі колькасць наркатычных сродкаў і псіхатропных рэчываў, заявіў 6 лютага на пасяджэнні калегіі Дзяржаўнага мытнага камітэта намеснік старшыні ведамства Эдуард Даніловіч. Паводле слоў чыноўніка, летась канфіскавана агулам 2,6 т наркотыкаў і псіхатропаў (на 1 т больш, чым у 2024 годзе; у 3 разы больш, чым у 2023-м).

Паводле сцвярджэння Даніловіча, кошт такой колькасці рэчываў на ценявым рынку складае каля 160 млн долараў. Колькасць разавых доз перавышае 8,5 млн.

У 2025 годзе колькасць асуджаных паводле “наркатычных” артыкулаў Крымінальнага кодэкса павялічылася на 7,9% у параўнанні з 2024-м, вынікае з даных Вярхоўнага суду.

За здзяйсненне злачынстваў, звязаных з незаконным абаротам наркотыкаў (арт. 327–331, 332), летась было асуджана 2.253 чалавекі — 8% усіх асуджаных (у 2024-м — 2.088; 6,6%).

З іх 2.077, або 92,2%, прызнаны вінаватымі паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.