“Беларускі пункт нязломнасці” завяршае працу ў Кіеве
8 сакавіка, Позірк. Пра закрыццё ў Кіеве з 8 сакавіка “Беларускага пункта нязломнасці” паведаміла на сваёй старонцы ў “Фэйсбуку” прадстаўніца валанцёрскага цэнтра” Сустрэча ” Алена Жаркевіч.
“Амаль два месяцы гэтая палатка ў Кіеве была месцам, дзе можна было сагрэцца, выпіць гарачай гарбаты, перакусіць і проста трохі адчуць чалавечае цяпло. За гэты час нам удалося накарміць і абагрэць сотні людзей. Але для мяне гэты пункт быў не толькі пра ежу і цяпло. Гэта было месца размоў. Тут мы шмат гаварылі з украінцамі пра Беларусь”, — напісала валанцёр.
“Беларусь — гэта не рэжым. Хтосьці гэта ведаў. А хтосьці шчыра здзіўляўся, калі даведваўся, як сёння жыве наша краіна. Мы гаварылі пра рэпрэсіі. Пра людзей, якія вымушаныя з’язджаць. Пра мігрантаў. Аб велізарным уплыве Расіі на Беларусь”, — адзначыла Жаркевіч.
Паводле яе слоў, беларусы, “як могуць, працягваюць змагацца”: “Для мяне было вельмі важна, што ўкраінцы слухалі і хацелі разумець”.
“А яшчэ гэты намёт чарговы раз даказаў мне адну простую рэч. Беларусы, калі трэба, умеюць быць разам. Умеюць арганізоўвацца. І не кідаюць адно аднаго. Я не перастаю гэтым захапляцца. І я сапраўды лічу, што беларусы — адна з самых цудоўных нацый. Не таму што я беларуска. А таму, што нашы людзі — шчырыя, добрыя і вельмі спагадлівыя”, — падкрэсліла Жаркевіч.
Яна падзякавала ўсім, хто мае дачыненне да “Беларускага пункта нязломнасці”: “Дзякуй усім, хто дапамагаў. Хто прыходзіў. Хто падтрымліваў словам, справай ці фінансамі. Дзякуючы вам гэты маленькі намёт змог зрабіць значна больш, чым я калісьці магла ўявіць”.
Валанцёр адзначыла, што пункт закрываецца, але “праца не спыняецца”. “Бо калі ты сапраўды хочаш нешта зрабіць — трэба проста браць і рабіць. І побач абавязкова з’яўляюцца людзі, якія дапамогуць. Я гэта бачу ўжо не першы раз. І ведаю — мы яшчэ зробім шмат важнага”, — напісала яна.
Пра пачатак працы ў Кіеве “Беларускага пункта нязломнасці” — спецыяльна абсталяванай лакацыі з магчымасцю абагрэцца і атрымаць базавую дапамогу ў сітуацыі адключэння святла і цяпла, Жаркевіч паведаміла 26 студзеня.
Прадстаўнік аб’яднання выказала падзяку ўсім, хто далучыўся да стварэння пункта. Яна таксама падзякавала “за разуменне таго, што адбываецца“, “за салідарнасць і спачуванне”.
“Беларусы, вы крутыя. Сапраўды, — напісала Жаркевіч на сваёй старонцы ў “Фэйсбуку”. — Я вельмі добра разумею, што не ўсе могуць прыехаць фізічна. Але я бачу і адчуваю, колькі людзей нас падтрымала — словам, справай, фінансамі і нават проста думкамі. І гэта мае вялікае значэнне”.
“Усталёўваючы гэты намёт, я, як і многія іншыя валанцёры, пачула шмат цёплых слоў на адрас беларусаў. Слоў падтрымкі і падзякі — за тых, хто ваюе, за тых, хто загінуў, за тых, хто сёння сядзіць і хто ўжо адседзеў за барацьбу з рэжымам, за незалежнасць Беларусі”, — дадала яна.
З паведамлення вынікала, што дапамогу ў стварэнні пункта сярод іншых аказалі беларусы, якія жывуць у ЗША, Канадзе, Польшчы, Літве, Германіі і інш.
24 студзеня Жаркевіч паведаміла, што “Сустрэча” атрымала месца для арганізацыі “Беларускага пункта нязломнасці”. Заклік далучыцца да яго стварэння ўпершыню з’явіўся ў тэлеграм-канале арганізацыі ў сярэдзіне студзеня.
У лістападзе мінулага года Міністэрства ўнутраных спраў прызнала “Сустрэчу” “экстрэмісцкім фарміраваннем”.
