Маладзёжныя зборныя Беларусі па валейболе дапушчаны да еўрапейскіх спаборніцтваў пад дзяржсімваламі — БФВ

6 сакавіка, Позірк. “Юніёрскія спартсмены з беларускімі пашпартамі” змогуць удзельнічаць у міжнародных спаборніцтвах пад дзяржаўным сцягам і з выкарыстаннем гімна, паведаміла Беларуская федэрацыя валейбола (БФВ) са спасылкай на Адміністрацыйны савет Еўрапейскай канфедэрацыі валейбола.

Верагодна, гаворка ідзе пра еўрапейскія турніры.

Рашэнне, як паведамляецца, было прынята 3 сакавіка на анлайн-пасяджэнні канфедэрацыі.

“Гэта важны крок для развіцця маладзёжнага валейбола і новая магчымасць для беларускіх спартсменаў праявіць сябе на еўрапейскім узроўні”, — заявілі ў беларускай федэрацыі.

У Беларусі дзейнічаюць мужчынскія і жаночыя юніёрскія і маладзёжныя зборныя па гэтым відзе спорту.

28 лютага 2022 года, праз некалькі дзён пасля пачатку вайны, Міжнародны алімпійскі камітэт заклікаў спартыўныя федэрацыі не дапускаць да спаборніцтваў атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт апынуўся амаль у поўнай ізаляцыі.

Беларусаў і расіян адхілілі ад міжнародных турніраў па валейболе 1 сакавіка 2022 года, неўзабаве пасля пачатку поўнамаштабнага ўварвання РФ ва Украіну.

28 сакавіка 2023 года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах.

Міжнародная федэрацыя валейбола (ФІВБ) у чэрвені 2023 года падоўжыла забарону на ўдзел зборных і клубаў з Беларусі і Расіі ў спаборніцтвах пад сваёй эгідай.

У снежні 2025-га рашэннем яе адміністрацыйнага савета абмежаванне было знята ў дачыненні да маладых спартсменаў. Змены пачалі дзейнічаць у студзені бягучага года.