Украіна і РФ правялі трэці сёлета абмен палоннымі праз тэрыторыю Беларусі
6 сакавіка, Позірк. У рамках абмену ваеннапалоннымі паміж Украінай і Расіяй праз Беларусь 6 сакавіка вызвалена па 300 чалавек з кожнага боку.
“Яшчэ 300 украінскіх абаронцаў вяртаюцца дадому з расійскага палону. Таксама сёння атрымалася вярнуць двух цывільных украінцаў”, — напісаў у сваім тэлеграм-канале прэзідэнт Украіны Уладзімір Зяленскі.
Сярод іх вайскоўцы Узброеных сіл, Нацыянальнай гвардыі і Дзяржаўнай памежнай службы, якія абаранялі Украіну на Данецкім, Луганскім, Харкаўскім, Запарожскім, Херсонскім кірунках, а таксама ў Марыупалі. Большасць з іх знаходзіліся ў палоне больш за год, некаторыя — з 2022 года.
Кіраўнік украінскай дзяржавы падзякаваў ЗША за падтрымку ў ажыццяўленні абмену.
Міністэрства абароны Расіі таксама паведаміла пра вяртанне 300 сваіх вайскоўцаў. Традыцыйна ўдакладняецца, што яны знаходзяцца на тэрыторыі Беларусі, “дзе ім аказваецца неабходная псіхалагічная і медыцынская дапамога”.
Паводле інфармацыі Масквы, “пасрэдніцкія намаганні гуманітарнага характару аказалі Аб’яднаныя Арабскія Эміраты і ЗША”.
Гэта трэці абмен ваеннапалоннымі ў 2026 годзе. Другі адбыўся 5 сакавіка (па 200 чалавек), першы — 5 лютага (па 157 чалавек).
Апошні раз у 2025 годзе Кіеў і Масква абмяняліся ваеннапалоннымі з выкарыстаннем беларускай тэрыторыі 2 кастрычніка (па 185 вайскоўцаў і па 20 грамадзянскіх асоб). Агулам летась Украіна і РФ правялі 18 этапаў абмену палоннымі, у 2024-м — 12.
Акрамя таго, пяць сем’яў з Расіі і пяць з Украіны ўз’ядналіся са сваімі блізкімі 4 верасня на беларуска-ўкраінскай мяжы пры пасрэдніцтве ўпаўнаважанага па правах чалавека ў РФ Таццяны Маскальковай.
Старшыня КДБ Беларусі Іван Церцель у інтэрв’ю беларускаму дзяржаўнаму тэлебачанню, якое выйшла ў эфір 22 чэрвеня 2025 года, заяўляў, што на той момант на тэрыторыі краіны было праведзена 38 аперацый абмену паміж Украінай і РФ.
Беларусь — адзіная краіна, якая мае непарыўную мяжу як з РФ, так і з Украінай.
24 лютага 2022 года Расія пры непасрэднай падтрымцы рэжыму ў Мінску распачала поўнамаштабную вайну з Украінай, уварваўшыся ў тым ліку з беларускай тэрыторыі.
