Коўл: Дзякуй Лукашэнку за памілаванне 18 палітвязняў, Трамп даручыў вызваліць усіх

5 сакавіка, Позірк. Спецпрадстаўнік прэзідэнта ЗША па Беларусі Джон Коўл падзякаваў Аляксандру Лукашэнку за памілаванне новай групы палітвязняў і паведаміў, што яму даручана вызваліць усіх.

“Дзякуй, прэзідэнт Лукашэнка, за памілаванне сёння 18 палітвязняў. Гэта яшчэ адзін важны крок у адносінах паміж ЗША і Беларуссю, паколькі прэзідэнт Трамп даручыў мне вызваліць усіх палітвязняў“, — напісаў Коўл у Х.

5 сакавіка прэс-служба Лукашэнкі паведаміла аб падпісанні ім указа аб памілаванні 18 чалавек, з якіх 15 “здзейснілі злачынствы экстрэмісцкай накіраванасці“.

Адзначалася, што большасць памілаваных — жанчыны (11), у шасці з іх ёсць дзеці, у тым ліку якія маюць інваліднасць і маюць патрэбу ў пастаяннай медыцынскай рэабілітацыі.

Памілаваныя таксама дзве шлюбныя пары, “жанчына, якая знаходзіцца на апошніх тэрмінах цяжарнасці, і адна асуджаная, якая пераступіла закон у 16-гадовым узросце”.

“Усе яны падалі хадайніцтва аб памілаванні, прызналі віну, раскаяліся ў тым, што здзейснілі, а таксама абяцалі весці правапаслухмяны лад жыцця“, — сказана ў рэлізе.

11 верасня 2025 года 52 вязні было вызвалена ў рамках угоды паміж адміністрацыяй прэзідэнта ЗША Дональда Трампа і Аляксандрам Лукашэнкам.

Летась 30 снежня ён падпісаў указ аб памілаванні 22 чалавек, з іх 20 чалавек было асуджана “за злачынствы экстрэмісцкай накіраванасці“, сярод памілаваных было 15 жанчын і сем мужчын, у 11 чалавек ёсць непаўналетнія дзеці.

19 лютага Лукашэнка памілаваў Наталлю Левую, асуджаную з палітычных матываў. Жанчына знаходзілася на апошнім тэрміне цяжарнасці.

Практыка вызвалення палітвязняў працягваецца з ліпеня 2024 года. Раней было не менш за 13 хваляў памілаванняў на падставе аналагічных указаў, у выніку якіх на волю выйшла каля 350 чалавек. Паралельна вязняў перыядычна вызваляюць і высылаюць з краіны — у рамках дамоўленасцяў прадстаўнікоў Адміністрацыі прэзідэнта ЗША з Лукашэнкам.

Трамп тройчы нагадваў Лукашэнку аб неабходнасці вызваліць усіх асуджаных з палітычных матываў.

Разам з тым праваабаронцы рэгулярна прызнаюць палітвязнямі новых людзей, якія церпяць пераслед з боку ўладаў.

На 5 сакавіка ў краіне 1.140 палітвязняў.