З 2020 года ў Беларусі ліквідавана больш за 2 тыс. НКА — Lawtrend

3 сакавіка, Позірк. З 2020 года і да пачатку лютага 2026-га ў Беларусі ліквідавана не менш як 2.012 НКА — аб’яднанняў, прафсаюзаў, фондаў, недзяржаўных устаноў, асацыяцый, вынікае з новага агляду праваабарончай арганізацыі Lawtrend.

На канец студзеня было ліквідавана не менш як 1.995 НКА, снежня 2025 года — 1.990, лістапада — 1.984, кастрычніка — 1.977, верасня — 1.970, жніўня — 1.950, ліпеня — 1.948, чэрвеня — 1.944, траўня — 1.936, красавіка — 1.926, сакавіка — 1.917, лютага — 1.905, студзеня — 1.896, на канец 2024 года — 1.891, на канец снежня 2023-га — 1.509.

Агулам за 2025 год ліквідавана мінімум 99 НКА, за 2024 — 382, за 2023 — 336.

Паводле інфармацыі Lawtrend, на канец студзеня ў працэсе прымусовай ліквідацыі знаходзілася не менш як 1.235 некамерцыйных арганізацый. На канец студзеня такіх было 1.223, снежня 2025 года — 1.220, лістапада — 1.216, кастрычніка — 1.214, верасня — 1.211, жніўня — 1.193, ліпеня — 1.192, чэрвеня — столькі ж, траўня — 1.190, красавіка — 1.189, сакавіка і лютага — 1.188, студзеня — 1.187, снежня 2024-га — 1.186.

Рашэнне пра самастойную ліквідацыю прыняло прынамсі 777 НКА. На канец студзеня такіх было 772, снежня 2025-га — 770, лістапада — 768, кастрычніка — 763, верасня — 759, жніўня — 757, ліпеня — 756, чэрвеня — 752, траўня — 746, красавіка — 737, сакавіка — 729, лютага — 717, студзеня — 709, на канец 2024 года — 705.

Праваабаронцы прыводзяць статыстыку Міністэрства юстыцыі, згодна з якой на 1 студзеня 2026 года ў Беларусі зарэгістраваны: чатыры палітычныя партыі і 844 іх арганізацыйныя структуры; 19 прафесійных саюзаў (15 рэспубліканскіх, адзін тэрытарыяльны і тры ў арганізацыях) і 27.466 іх арганізацыйных структур; 1.337 грамадскіх аб’яднанняў (121 міжнароднае, 290 рэспубліканскіх і 926 мясцовых) і 47.812 іх арганізацыйных структур; 43 саюзы (асацыяцыі) грамадскіх аб’яднанняў; 7 рэспубліканскіх дзяржаўна-грамадскіх аб’яднанняў.

Адзначаецца, што ў адрозненне ад папярэдніх гадоў, у апублікаванай статыстыцы адсутнічае разбіўка зарэгістраваных грамадскіх аб’яднанняў па напрамках дзейнасці.

Колькасць зарэгістраваных фондаў Міністэрствам юстыцыі не публікуецца на працягу апошніх некалькіх гадоў. Таксама адсутнічае статыстыка па колькасці зарэгістраваных недзяржаўных устаноў і асацыяцый (саюзаў) юрыдычных асоб.

Паводле даных Lawtrend, на канец 2025 года ў Адзіным дзяржаўным рэгістры юрыдычных асоб і індывідуальных прадпрымальнікаў (АДР) была размешчана інфармацыя пра 1.357 дзеючых грамадскіх аб’яднанняў. Розніца з афіцыйнай статыстыкай Мінюста “звязаная з недастаткова якасным вядзеннем АДР, дубляваннем інфармацыі і недастатковай аператыўнасцю ўнясення змяненняў”.

Статыстыка Міністэрства юстыцыі “таксама сведчыць пра змяненне на працягу апошняга года ранейшага падыходу да ўліку грамадскіх аб’яднанняў, пры якім іх агульная колькасць павялічвалася за кошт захавання ў АДР звестак пра нядзеючыя арганізацыі, у тым ліку не прайшоўшыя абавязковую дзяржаўную перарэгістрацыю альбо якія знаходзяцца ў стадыі ліквідацыі, але фармальна не выключаныя з рэгістра”.

Праваабаронцы адзначаюць, што ў сувязі з ажыццяўленнем прафесійнай дзейнасці, удзелам у арганізацыях грамадзянскай супольнасці і праяўленнем грамадзянскай актыўнасці не менш за трох прадстаўнікоў праваабарончых арганізацый працягваюць адбываць пакаранне ў выглядзе пазбаўлення волі. Таксама ў месцах пазбаўлення волі знаходзяцца дзясяткі прадстаўнікоў арганізацый грамадзянскай супольнасці і рэлігійных арганізацый, не менш за 20 прадстаўнікоў прафесійных саюзаў і рабочага руху.