Жыхарку Пінскага раёна абвінавачваюць у сутэнёрстве ў Дубаі

3 сакавіка, Позірк. 27-гадовай жыхарцы Пінскага раёна (Брэсцкая вобласць) прад’яўленыя абвінавачванні паводле ч. 1 арт. 1711 (уцягванне ў занятак прастытуцыяй) і ч. 2 арт. 171 (арганізацыя і выкарыстанне занятку прастытуцыяй іншай асобай, спалучанае з вывазам за межы дзяржавы асобы для занятку прастытуцыяй) Крымінальнага кодэкса, паведамляе Следчы камітэт.

Жанчына ўзятая пад варту.

Паводле даных следства, у верасні 2023 года дзяўчына пачала аказваць інтымныя паслугі ў Дубаі (ААЭ), аддаючы палову заробку наймальніку, а пазней занялася сутэнёрствам.

Сцвярджаецца, што яна курыравала дзейнасць чатырох ураджэнак Беларусі, якім падшуквала кліентаў, кантралявала графік і вырашала арганізацыйныя пытанні.

Фігурантку справы затрымалі ў аэрапорце Мінска, калі яна “суправаджала чарговую дзяўчыну для вылету ў Дубай”, адзначае СК.

На пачатковым этапе следства жыхарка Пінскага раёна прызнала віну, але пазней “вылучыла версію, што не вербавала дзяўчат, а проста іх суправаджала”. Аднак, як заяўляецца, следчыя “вывучылі матэрыялы аператыўна-вышуковай дзейнасці, дэталізацыю тэлефонных злучэнняў, перапіскі ў месенджарах і фатаграфіі”, якія пацвердзілі “злачынную дзейнасць фігуранткі”.

Гл. таксама:

Жыхарка Віцебскай вобласці выкарыстоўвала 16-гадовую дачку для аказання секс-паслуг — СК

У Ізраілі з дапамогай грамадзянкі Беларусі раскрытая сетка па арганізацыі прастытуцыі і гандлю людзьмі