У ДТЗ у Рэчыцкім раёне загінула два чалавекі, у тым ліку дзіця

2 сакавіка, Позірк. Два чалавекі, у тым ліку хлопчык дзевяці гадоў, загінулі ў ДТЗ у Рэчыцкім раёне Гомельскай вобласці, паведамляе Міністэрства ўнутраных спраў.

Лабавое сутыкненне легкавога Renault пад кіраваннем 35-гадовай жанчыны і грузавіка DAF пад кіраваннем 36-гадовага мужчыны адбылося каля 8:30 2 сакавіка на 101 км аўтадарогі Р-82 “Кастрычніцкі — Парычы — Рэчыца“.

Кіроўца Renault, якая выехала на сустрэчную паласу, і яе дзіця загінулі на месцы здарэння. 57-гадовая жанчына-пасажыр у цяжкім стане дастаўлена ў бальніцу.

На месцы здарэння працуе следча-аператыўная група.

На 6%, паводле папярэдніх звестак, скарацілася ў 2025 годзе агульная колькасць дарожна-транспартных здарэнняў у Беларусі. Пра гэта паведаміў 4 студзеня начальнік Галоўнага ўпраўлення ДАІ МУС Віктар Ротчанкаў.

Паводле яго, на 9% знізілася колькасць аварый з пацярпелымі, колькасць загінулых зменшылася з 434 да 417 (4%).

ДАІ паведамляла таксама, што ў 2025 годзе ў ДТЗ загінула 25 дзяцей.

Сітуацыя з гібеллю людзей у дарожна-транспартных здарэннях за 2024 год нязначна палепшылася ў параўнанні з 2023 годам, вынікае з праведзенага “Позіркам“ аналізу дадзеных Нацыянальнага статыстычнага камітэта (434 супраць 436), пры гэтым колькасць ДТЗ павялічылася (з 3.173 да 3.453, або на 8,8%).