Ціханоўская: Беларусы салідарныя са свабодным народам Ірана, а не з рэпрэсіўным рэжымам
28 лютага, Позірк. Беларусы “салідарныя са свабодным народам Ірана, а не з рэпрэсіўным рэжымам”, заявіла дэмакратычны лідар Святлана Ціханоўская 28 лютага на фоне сумеснага ўдару Ізраіля і ЗША па іранскай тэрыторыі.
“Іранскі народ заслугоўвае міру, поўнай павагі правоў чалавека і доўгачаканай свабоды”, — напісала палітык на сваёй старонцы ў сацыяльнай сетцы Х.
Раней МЗС выказала занепакоенасць “абвастрэннем сітуацыі паміж Ізраілем і Іранам, які закрануў таксама дружалюбныя краіны Заліва”. Ведамства рэкамендавала беларусам “устрымацца ад паездак у закранутыя канфліктам краіны рэгіёну”, а тым, хто ўжо там, — выконваць патрабаванні мясцовых уладаў, пазбягаць месцаў збору вялікай колькасці людзей.
Пазней знешнепалітычнае ведамства выступіла з заявай, у якой асудзіла “любыя ўзброеныя дзеянні, якія вядуць да гібелі грамадзянскага насельніцтва, у тым ліку ў выніку невыбіральнага выкарыстання сілы”. Такім чынам МЗС адрэагавала на гібель мірных грамадзян, у прыватнасці ў горадзе Мінаб, дзе, паводле паведамлення мясцовых уладаў, у выніку ўдару па школе загінула больш за 50 чалавек, пераважна дзяцей.
Ранкам 28 лютага Ізраіль і Злучаныя Штаты Амерыкі распачалі ваенныя дзеянні ў Іране, раздаліся выбухі ў Тэгеране, Ісфахане і Куме. Спачатку ўлады ў Тэль-Авіве заявілі пра “прэвентыўны” ўдар, а пазней абвясцілі пра пачатак аперацыі “Ільвіны рык”. Прэм’ер-міністр Ізраіля Біньямін Нетаньяху заявіў, што яго краіна нанясе “цяжкі ўдар па тэрарыстычным рэжыме” і створыць умовы, “якія дазволяць іранскаму народу скінуць з сябе гэты цяжар”.
Міністэрства вайны ЗША абвясціла пра пачатак аперацыі “Эпічная лютасць”. Амерыканскі прэзідэнт Дональд Трамп выступіў са зваротам, у якім назваў яе мэты — знішчэнне ракет, разгром флоту, прадухіленне стварэння ядзернай зброі і свабода для іранскага народа.
“Мы зноў і зноў спрабавалі заключыць пагадненне [па згортванні іранскай ядзернай праграмы], а яны спрабавалі распрацаваць ядзерную зброю”, — сказаў ён. Трамп заклікаў іранцаў не выходзіць з дамоў: “Калі мы скончым — вазьміце ўладу”.
У сваю чаргу Іран спачатку запусціў ракеты па Ізраілі, а пасля — па амерыканскіх базах у краінах Блізкага Усходу.
Саудаўская Аравія асудзіла “абуральную іранскую агрэсію і грубае парушэнне суверэнітэту” ААЭ, Бахрэйна, Катара, Кувейта і Іарданіі, пацвердзіўшы гатоўнасць “задзейнічаць усе свае магчымасці для аказання ім садзейнічання ва ўсіх захадах, што яны робяць”. Яна таксама папярэдзіла Іран пра “цяжкія наступствы працягу парушэнняў суверэнітэту дзяржаў і прынцыпаў міжнароднага права”.
Ваенныя дзеянні на Блізкім Усходзе пачаліся праз некалькі дзён пасля чарговага раунда перагавораў па іранскай ядзернай праграме. Вашынгтон настойваў на тым, каб Тэгеран закрыў асноўныя ядзерныя аб’екты і перадаў ЗША ўвесь узбагачаны ўран, іранскія ўлады заявілі пра гатоўнасць заключыць пагадненне толькі пры скасаванні санкцый.
