У сувязі з ударамі па Іране МЗС Беларусі асудзіў “любыя ўзброеныя дзеянні, якія вядуць да гібелі грамадзянскага насельніцтва”

28 лютага, Позірк. “У сувязі з пачаткам сумесных ваенных дзеянняў ЗША і Ізраіля супраць Ірана рашуча асуджаем любыя ўзброеныя дзеянні, якія вядуць да гібелі грамадзянскага насельніцтва, у тым ліку ў выніку невыбіральнага выкарыстання сілы”, — гаворыцца ў заяве, якой Міністэрства замежных спраў Беларусі адрэагавала на гібель мірных грамадзян у выніку “эскалацыі канфлікту на Блізкім Усходзе”.

“Асабліва ўзрушаныя весткамі з іранскага горада Мінаб, дзе ў выніку ўдару па школе для дзяўчынак загінулі дзясяткі дзяцей. У гэтыя хвіліны нашы думкі з сем’ямі загінулых, мы шчыра смуткуем разам з імі, — гаворыцца ў дакуменце. — У сувязі з гэтым мімаволі задаемся пытаннем: як смерць ні ў чым не вінаватых дзяўчынак, якія марылі пра будучыню, можа наблізіць урэгуляванне любога, нават самага складанага палітычнага пытання? Перакананыя, што няма і не можа быць мэты, якая апраўдвае гібель дзяцей”.

“У чарговы раз заклікаем усе бакі вярнуцца да вырашэння рознагалоссяў выключна палітыка-дыпламатычным шляхам. Лічым, што міжнародная супольнасць мае прыкласці ўсе намаганні для недапушчэння гібелі мірных грамадзян і эскалацыі гвалту”, — адзначыла МЗС.

Раней МЗС выказала занепакоенасць “абвастрэннем сітуацыі паміж Ізраілем і Іранам, які закрануў таксама дружалюбныя краіны Заліва”. Ведамства рэкамендавала беларусам “устрымацца ад паездак у закранутыя канфліктам краіны рэгіёну”, а тым, хто ўжо там, — выконваць патрабаванні мясцовых уладаў, пазбягаць месцаў збору вялікай колькасці людзей.

Al Jazeera са спасылкай на іранскія дзяржаўныя крыніцы паведаміла, што ў выніку ізраільскага ўдару па школе для дзяўчынак у горадзе Мінаб на поўдні Ірана загінула больш за 50 чалавек, большасць — дзеці.

Ранкам 28 лютага Ізраіль і Злучаныя Штаты Амерыкі распачалі ваенныя дзеянні ў Іране, раздаліся выбухі ў Тэгеране, Ісфахане і Куме.

Спачатку ўлады ў Тэль-Авіве заявілі пра “прэвентыўны” ўдар, а пазней абвясцілі пра пачатак аперацыі “Ільвіны рык”. Прэм’ер-міністр Ізраіля Біньямін Нетаньяху заявіў, што яго краіна нанясе “цяжкі ўдар па тэрарыстычным рэжыме” і створыць умовы, “якія дазволяць іранскаму народу скінуць з сябе гэты цяжар”.

Міністэрства вайны ЗША абвясціла пра пачатак аперацыі “Эпічная лютасць”. Амерыканскі прэзідэнт Дональд Трамп выступіў са зваротам, у якім назваў яе мэты — знішчэнне ракет, разгром флоту, прадухіленне стварэння ядзернай зброі і свабода для іранскага народа.

“Мы зноў і зноў спрабавалі заключыць пагадненне [па згортванні іранскай ядзернай праграмы], а яны спрабавалі распрацаваць ядзерную зброю”, — сказаў ён.

Трамп заклікаў іранцаў не выходзіць з дамоў: “Калі мы скончым — вазьміце ўладу”.

У сваю чаргу Іран спачатку запусціў ракеты па Ізраілі, а пасля — па амерыканскіх базах у краінах Блізкага Усходу.

Саудаўская Аравія асудзіла “абуральную іранскую агрэсію і грубае парушэнне суверэнітэту” ААЭ, Бахрэйна, Катара, Кувейта і Іарданіі, пацвердзіўшы гатоўнасць “задзейнічаць усе свае магчымасці для аказання ім садзейнічання ва ўсіх захадах, што яны робяць”. Яна таксама папярэдзіла Іран пра “цяжкія наступствы працягу парушэнняў суверэнітэту дзяржаў і прынцыпаў міжнароднага права”.

Ваенныя дзеянні на Блізкім Усходзе пачаліся праз некалькі дзён пасля чарговага раунда перагавораў па іранскай ядзернай праграме. Вашынгтон настойваў на тым, каб Тэгеран закрыў асноўныя ядзерныя аб’екты і перадаў ЗША ўвесь узбагачаны ўран, іранскія ўлады заявілі пра гатоўнасць заключыць пагадненне толькі пры скасаванні санкцый.