23 лютага, Позірк. У Беларусі трэба “сур’ёзную ўвагу звярнуць на падрыхтоўку афіцэраў”, заявіў Аляксандр Лукашэнка на цырымоніі ўручэння дзяржузнагарод і генеральскіх пагонаў, прымеркаванай да Дня абаронцаў Айчыны і Узброеных сіл (23 лютага).
“Адчуваю нутром, што мы не дапрацоўваем менавіта там, — цытуе палітыка яго прэс-служба. — Таму недзе ў нас, мы гэта бачым у праверцы, хібы сярод тых, каго мы правяраем”.
Лукашэнка заявіў, што бачыць “сітуацыю, якая складваецца падчас ваенных дзеянняў побач з Беларуссю”, верагодна, маючы на ўвазе, вайну РФ супраць Украіны, і “ведае ўсе недахопы”. Паводле яго слоў, ён не хоча, каб “гэтыя недахопы былі ўласцівыя” беларускім вайскоўцам.
“Я зямны чалавек, які нямала праслужыў у арміі, і разумею: у нас людзі розныя, новае пакаленне — ведаеце, якое яно. І ведаеце добра якасць тых людзей, якія прыходзяць ва Узброеныя сілы, — сказаў ён. — Так будзе і на вайне. Так ёсць на тым фронце побач з намі… Але той, хто ўмее, хто фізічна моцны (пра гэта нас папярэджвалі тыя, хто ваяваў ва Украіне), — яны будуць жыць. Той, хто шалтай-балтай, у тым ліку і афіцэры, — яны загінуць у бліжэйшыя гадзіны. Таму фізічная падрыхтоўка і тая зброя, што вам будзе ўручаная, — галоўная для захавання вашага жыцця, а таксама і нашай краіны”.
Таму, зрабіў выснову спікер, “калі падрыхтаваны афіцэр — узвод, рота, батальён, дывізія, брыгада заўсёды выканаюць у цэлым пастаўленую перад імі задачу”.
З 16 студзеня ў Беларусі на даручэнне Лукашэнкі праводзіцца раптоўная праверка боегатоўнасці ўсіх відаў і родаў Узброеных сіл — у абыход Міністэрства абароны. Мерапрыемствы запланаваныя да вясны. 18 лютага дзяржсакратар Савета бяспекі Аляксандр Вальфовіч паведаміў Лукашэнку пра яе далейшае правядзенне.
Паралельна з 26 студзеня з ініцыятывы Мінабароны праводзіцца “планавая” комплексная праверка боегатоўнасці вайсковых часцей і падраздзяленняў.
