Паўгода таму знік Анатоль Котаў, пра яго лёс нічога невядома
21 лютага, Позірк. Роўна паўгода няма ніякай інфармацыі пра лёс міжнароднага каардынатара Беларускага фонду спартыўнай салідарнасці (БФСС) Анатоля Котава, які знік у Турцыі 21 жніўня 2025 года.
Жонка Котава Анастасія Піліпчык атрымала ад яго апошняе паведамленне ў 21:12 па польскім часе 21 жніўня, а апошняе яе паведамленне, якое ён прагледзеў, было адпраўлена ў той дзень у 21:28. Пасля гэтага Котаў на сувязь больш не выходзіў.
23 і 24 жніўня Піліпчык патэлефанавала і напісала ў Генеральнае консульства Польшчы ў Стамбуле і звярнулася ў раённае аддзяленне паліцыі ў Варшаве. 25 жніўня яна адправіла заяву аб знікненні чалавека ў Дэпартамент паліцыі Стамбула па электроннай пошце.
Усе гэтыя дзеянні не далі вынікаў.
27 жніўня Піліпчык падала заяву ў пракуратуру Польшчы аб знікненні Котава. Праваахоўныя ведамствы Польшчы не сталі ўзбуджаць справу, бо ён не з’яўляецца грамадзянінам Польшчы і знік на тэрыторыі іншай дзяржавы.
Пра тое, што Котаў, які прыбыў 21 жніўня з Варшавы ў Стамбул, увечары таго ж дня пакінуў Турцыю праз порт Трабзона, паведаміла 28 жніўня турэцкае навінавае агенцтва IHA.
Пазней у той жа дзень кіраўнік БФСС Аляксандр Апейкін паведаміў, што “калегі і блізкія Анатоля Котава мяркуюць яго прымусовую неафіцыйную экстрадыцыю з тэрыторыі Турцыі”.
Пра тое, што Котаў накіраваўся ў Сочы на прыватнай яхце, паведаміла Deutsche Welle са спасылкай на “крыніцу ў паліцыі Трабзона” 29 жніўня.
27 жніўня БФСС заклікаў міжнародную спартыўную супольнасць і праваабарончыя арганізацыі “тэрмінова звярнуць увагу на знікненне” функцыянера, якога назваў “заўважным спартыўным чыноўнікам” і “даўнім абаронцам правоў беларускіх спартсменаў”.
БФСС адзначаў, што Котаў 21 жніўня адправіўся ў Стамбул па “прафесійных справах”.
Котаў — экс-супрацоўнік адміністрацыі Аляксандра Лукашэнкі і Кіраўніцтва справамі прэзідэнта, былы генеральны сакратар Нацыянальнага алімпійскага камітэта, дыпламат з досведам працы ў Міністэрстве замежных спраў.
У 2020 годзе пакінуў дзяржслужбу, падтрымаў масавыя пратэсты і далучыўся да БФСС. Неўзабаве пасля гэтага эміграваў у Польшчу.
Беларускі фонд спартыўнай салідарнасці быў заснаваны спартыўнымі функцыянерамі і атлетамі ў адказ на падзеі пасля прэзідэнцкіх выбараў 2020 года. Займаецца падтрымкай спартсменаў, якія падвергліся пераследу, і абаронай іх правоў. Прызнаны “экстрэмісцкім фарміраваннем”.
