21 лютага, Позірк. Масавыя затрыманні выдаўцоў і кнігараспаўсюднікаў прайшлі ў Мінску 17–18 лютага, паведамляе “Наша Ніва”.
“Ператрусы і затрыманні былі не адзінкавымі і не выпадковымі, а сістэмнымі, спланаванымі. У некаторых сем’ях затрымалі па некалькі чалавек. Пры ператрусах ва ўсіх прысутных у кватэрах і офісах правяралі тэлефоны”, — гаворыцца ў публікацыі.
Адзначаецца, што сілавікі прыходзілі “да супрацоўнікаў як дзейных, так і раней закрытых выдавецтваў, як да кіраўнікоў выдавецтваў, так і да звычайных супрацоўнікаў”, а таксама да “прадпрымальнікаў, якія займаюцца распаўсюджваннем кніжнай прадукцыі”.
“Усе затрыманыя маюць вялікія заслугі перад беларускай культурай”, — падкрэслівае выданне.
“Што канкрэтна шукалі, пакуль незразумела. Бліжэйшыя некалькі тыдняў пакажуць, ці была гэта проста акцыя застрашвання — і тады пераслед абмяжуецца адміністрацыйнымі арыштамі, — або сілавікі маюць намер завесці крымінальныя справы”, — паведамляе медыя.
Раней, як заяўляецца, “арышты прайшлі ў некалькіх іншых ячэйках рознага тыпу ў сталіцы і рэгіёнах”: “Мяркуючы па той інфармацыі, якая даходзіць, там шукалі доказы фінансавання з фондаў салідарнасці або сувязі з беларусамі замежжа”.
Экс-палітвязень, блогер Ігар Лосік паведаміў у сваім тэлеграм-канале пра затрыманне папулярызатара беларускай мовы, грамадскага дзеяча Ігара Кіма. Таксама затрыманая яго жонка.
Паводле звестак праваабарончага цэнтра “Вясна”, усяго было затрымана не менш за 10 чалавек. Частку з іх “адправілі на суткі”, адзначаюць праваабаронцы.
21 лютага, спаслаўшыся на “пэўныя прычыны”, аб спыненні працы паведаміла выдавецтва “Тэхналогія”.
10 лютага на 45-м годзе жыцця памёр кнігавыдавец і паэт Раман Цымбераў. У яго адмовілі ныркі, пасля чаго здарыўся інсульт.
Пасля прэзідэнцкіх выбараў 2020 года многія беларускія незалежныя выдаўцы падвергліся ганенням і рэпрэсіям.
Увесну 2022 года Мінінфарм прыпыняў дзейнасць выдавецтваў “Медысонт” (пасля адмовілася ад выдавецкай дзейнасці, пераключыўшыся на аказанне паліграфічных паслуг), “Галіяфы”, “Лімарыус” і “Кнігазбор” (усе ліквідаваныя). Пазней у судовым парадку было пазбаўлена ліцэнзіі выдавецтва “Янушкевіч” (працягвае дзейнасць у Польшчы).
