У Польшчы выстаўленыя абвінавачанні траім падазраваным у датычнасці да кантрабанды беларускіх цыгарэт
20 лютага, Позірк. Пра затрыманне і выстаўленне траім грамадзянам Польшчы абвінавачанняў у дастаўцы з Беларусі на тэрыторыю Еўрасаюза 6 тыс. пачкаў цыгарэт без акцызных марак з дапамогай паветраных шароў паведаміла раённая пракуратура ў польскай Саколцы.
Акрамя абвінавачанняў, звязаных з ухіленнем ад выплаты падаткаў і ўтойваннем ад мытні прадмета падаткаабкладання, затрыманым таксама ставіцца ў віну дзеянне, прадугледжанае законам аб спецыяльных мерах па супрацьдзеянні падтрымцы агрэсіі супраць Украіны і ў абарону нацыянальнай бяспекі.
Абвінавачанні звязаныя з тым, што гэтыя дзеянні “дазваляюць Рэспубліцы Беларусь дыверсіфікаваць крыніцы даходаў і тым самым удзельнічаць у агрэсіі Расійскай Федэрацыі супраць Украіны”, патлумачыла пракуратура.
“Пастановамі ад 17 лютага 2026 года прымененая маёмаснае забеспячэнне ў сумах: 105.300 злотых — адносна маёмасці аднаго з падазроных, а таксама 119.600 злотых і 9.300 еўра (эквівалент 39.134,4 злотых), — адносна маёмасці другога падазраванага”, — гаворыцца ў паведамленні.
Усім затрыманым раённы суд у Саколцы абраў меру стрымання ў выглядзе ўзяцця пад варту тэрмінам на 3 месяцы.
Вытворчасць па справе “мае характар вытворчасці з развіццём; плануецца правядзенне далейшых працэсуальных дзеянняў, скіраваных на высвятленне іншых асоб, якія маюць дачыненне да злачыннай дзейнасці”, адзначыла пракуратура.
Апошні раз Аператыўнае камандаванне радоў Узброеных сіл Польшчы паведамляла пра чарговыя “ўлёты ў польскую паветраную прастору з боку Беларусі аб’ектаў, якія паводле характарыстык нагадваюць паветраныя шары”, у ноч на 17 лютага. Да таго такія факты фіксаваліся 28 і 31 студзеня, а таксама 1, 2, 4, 9 і 16 лютага.
У апошнім паведамленні адзначалася, што Аператыўнае камандаванне “супрацоўнічае са службамі, адказнымі за бяспеку дзяржавы, рэгулярна перадаючы неабходную інфармацыю, якая дазваляе хутка рэагаваць, у тым ліку перахапляць аб’екты і затрымліваць асоб, што падазраюцца ва ўдзеле ў гэтых інцыдэнтах”.
22 студзеня стала вядома, што Міністэрства замежных спраў Польшчы выклікала часовага паверанага ў справах Беларусі, запатрабаваўшы тлумачэнняў наконт прылёту ў краіну 150 паветраных шароў у ноч на 17 студзеня.
2 лютага Памежная ахова Польшчы паведаміла, што ў студзені 2026 года ў краіне выяўлена каля 1,75 млн цыгарэт, дастаўленых з Беларусі з дапамогай паветраных шароў. Кошт канфіскаванага тавару ацэньваецца прыкладна ў 1,78 млн злотых (каля 497 тыс. долараў).
Запуск метэазондаў з кантрабандай з Беларусі ў Польшчу носіць правакацыйна-кантрабандысцкую мэту, заявіў 9 лютага на прэс-канферэнцыі ў Варшаве віцэ-прэм’ер, міністр абароны Польшчы Уладзіслаў Касіняк-Камыш. “Гэта гібрыдная вайна. З аднаго боку — заробак пэўнай групы, якая мае дазвол ад Беларусі на кантрабанду, з другога боку — спроба заспець знянацку і пасеяць непакой”, — сказаў ён.
Паводле слоў міністра, тое, што адбываецца, ажыццяўляецца альбо беларускімі службамі, альбо пры іх падтрымцы.
13 лютага польская памежная служба паведаміла пра затрыманне васьмі чалавек, якія, як сцвярджалася, займаліся кантрабандай цыгарэт з Беларусі з дапамогай паветраных шароў.
