Ціханоўская заклікала еўрапейскіх дыпламатаў у Жэневе дапамагчы абараніць беларусаў у выгнанні

19 лютага, Позірк. Абараняць пражываючых беларусаў у выгнанні ад транснацыянальных рэпрэсій і дапамагаць дэмсілам Беларусі ў распрацоўцы комплексных рашэнняў для рэпрэсаваных беларусаў, якія пражываюць у краінах ЕС, заклікала Святлана Ціханоўская 18 лютага ў Жэневе (Швейцарыя) на брыфінгу для прадстаўнікоў краін ЕС пры Аддзяленні ААН, якое знаходзіцца ў гэтым горадзе.

Дыпламаты ў тым ліку прадстаўляюць свае краіны пры Савеце ААН па правах чалавека (СПЧ ААН).

“У той жа час важна падтрымліваць мабільнасць беларусаў, і я ўдзячная Германіі, Італіі, Францыі і Венгрыі — краінам, якія выдаюць найбольшую колькасць шэнгенскіх віз беларусам”, — сказала Ціханоўская.

Звяртаючыся да прадстаўнікоў краін ЕС, яна заклікала іх, “падтрымліваючы гуманітарныя намаганні Злучаных Штатаў, захаваць еўрапейскія санкцыі супраць рэжыму, закрываючы існыя шчыліны”. Паводле яе слоў, санкцыі павінны быць накіраваны на сістэмныя змены, пачынаючы са спынення рэпрэсій.

Яна таксама заклікала прасоўваць тэму адказнасці рэжыму, выкарыстоўваючы такія механізмы як Міжнародны крымінальны суд, Міжнародную арганізацыю працы, універсальную юрысдыкцыю, трыбунал па ваенных злачынствах ва Украіне і інш.

Яна прапанавала еўрапейскім пастаянным членам Савета Бяспекі ААН (Вялікабрытаніі і Францыі) “ініцыяваць слуханні па беларускім пытанні па формуле Арыі“ (нефармальныя канфідэнцыйныя сустрэчы членаў СБ ААН, якія праводзяцца для свабоднага абмену думкамі з запрошанымі асобамі, арганізатарамі або экспертамі. — “Позірк“.).

Ціханоўская папрасіла захаваць абодва існуючыя мандаты СПЧ ААН па Беларусі — спецыяльнага дакладчыка і групы незалежных экспертаў, якія “дапаўняюць адзін аднаго і выконваюць выключна важную працу“.

Дэмлідар заклікала “падтрымліваць і ўзаемадзейнічаць з дэмакратычнымі беларускімі інстытутамі — такімі як наш офіс, [Аб’яднаны пераходны] кабінет, Каардынацыйная рада”. “Я ўдзячная ЕС, Вялікабрытаніі, Канадзе і Злучаным Штатам за фармалізацыю стасункаў з намі праз стратэгічныя дыялогі“, — падкрэсліла яна.

Ціханоўская заклікала прысутных “замест накіравання амбасадараў у Мінск прызначаць спецыяльных прадстаўнікоў для працы з дэмакратычным беларускім грамадствам — як гэта зрабілі Францыя, Латвія, Эстонія, Польшча, Швецыя і многія іншыя“.

Таксама яна заклікала павялічыць падтрымку незалежных беларускіх СМІ, грамадзянскай супольнасці і культурных ініцыятыў, “таму што ідэнтычнасць з’яўляецца нашым шчытом супраць “рускага свету“. У гэтым кантэксце яна адзначыла ўклад Еўрапейскай камісіі, а таксама Швецыі і Польшчы, якія з’яўляюцца найбуйнейшымі донарамі.