Замест пасяджэння Савета міру ў Трампа Рыжанкоў узяў удзел у літаратурным вечары ў Мінску

19 лютага, Позірк. Аб удзеле міністра замежных спраў Максіма Рыжанкова ў літаратурным вечары, прымеркаваным да Міжнароднага дня роднай мовы і Года беларускай жанчыны, паведаміла беларускае знешнепалітычнае ведамства.

Адзначаецца, што мерапрыемства арганізавана 19 лютага МЗС Беларусі сумесна з міжнародным спадарожнікавым тэлеканалам “Беларусь 24″ пры падтрымцы Мінгарвыканкама.

У святочным вечары ўзялі ўдзел прадстаўнікі дыпламатычнага корпуса, акрэдытаванага ў Беларусі, і члены Нацыянальнай камісіі па справах ЮНЕСКО — агулам больш за 100 гасцей з 30 дзяржаў.

Рыжанкоў, які, як паведамлялася раней, 19 лютага павінен быў узяць удзел у першым пасяджэнні створанага па ініцыятыве прэзідэнта ЗША Дональда Трампа Савета міру, які адкрыўся ў Вашынгтоне, выступіў на вечары з прывітальным словам.

11 лютага прэс-сакратарка Лукашэнкі Наталля Эйсмант паведаміла, што той не возьме ўдзел у першым пасяджэнні Савета міру. Яна патлумачыла гэта тым, што беларускі бок позна атрымаў запрашэнне.

“Так, запрашэнне на першую сустрэчу лідараў у рамках Савета міру прэзідэнту Беларусі паступіла, — заявіла яна. — На жаль, мы яго атрымалі позна, працоўны графік прэзідэнта на гэты перыяд ужо быў спланаваны. Так, мы з задавальненнем наведалі б Злучаныя Штаты Амерыкі, але ёсць пытанні, якія немагчыма адкласці“.

“Акрамя таго, мы прымаем да ўвагі і магчымыя лагістычныя складанасці, якія могуць узнікнуць з-за незаконных санкцый, у першую чаргу Еўрасаюза — з улікам закрыцця паветранай прасторы над ЕС. У гэтай сувязі і нягледзячы на наша жаданне, прэзідэнт у дадзеным мерапрыемстве ўзяць удзел не зможа”, — сказала Эйсмант.

Тады прэс-сакратар Лукашэнкі паведаміла, што прадстаўляць Мінск на сустрэчы ў Вашынгтоне будзе міністр замежных спраў Максім Рыжанкоў.

15 студзеня Трамп абвясціў аб фармаванні Савета міру, які будзе кіраваць аднаўленнем сектара Газа. Стварэнне гэтай структуры ўваходзіць у мірны план амерыканскага лідара для Газы разам з размяшчэннем міжнародных сіл.

Узначаліў орган сам прэзідэнт ЗША. У яго ўстаноўчы выканаўчы савет увайшлі дзяржсакратар ЗША Марка Рубіа, спецпрадстаўнік Трампа па Блізкім Усходзе і Расіі Стывен Уіткаф, зяць Трампа Джарэд Кушнер, былы прэм’ер-міністр Вялікабрытаніі Тоні Блэр, намеснік дарадцы па нацбяспецы ЗША Роберт Гэбрыел, кіраўнік Сусветнага банка Аджай Бангка і інвестар Марк Роуэн.

Паводле інфармацыі заходніх СМІ, ЗША запрасілі далучыцца да Савета міру больш за 50 дзяржаў.

Лукашэнка падпісаў дакумент аб далучэнні Беларусі да Савета міру 20 студзеня. У той жа дзень ён заявіў, што далучэнне Беларусі да савета важна з пункту гледжання магчымасцяў арганізацыі, створанай Дональдам Трампам.

“Мяне вабіць тое, што гэты Савет міру, яго дзеянні, магчымасці могуць распаўсюдзіцца на іншыя часткі планеты. Перш за ўсё, можа быць, і Украіне мы дапаможам, зможам наблізіць мір, зможам паўплываць на кіраўніцтва ўкраінскае. Вось гэта мяне больш за ўсё вабіць, а не тое, што мы ўжо моцна дапаможам Газе. Я ведаю свае магчымасці і магчымасці Беларусі”, — цытавала Лукашэнку яго прэс-служба.