Беларусь упершыню за 28 гадоў засталася без алімпійскіх медалёў у фрыстайле
18 лютага, Позірк. Беларускія спартсмены ўпершыню з 1998 года засталіся без алімпійскіх медалёў у фрыстайле (лыжная акрабатыка).
Гэта стала вядома, пасля таго як у фінале Алімпійскіх гульняў, якія праходзяць у Італіі, чэмпіёнка 2018 года і сярэбраны прызёр 2022-га Ганна Гуськова заняла 8-е месца.
Беларускі Анастасія Андрыянава і Ганна Дзяруга занялі 16-е і 17-е месца, не прабіўшыся ў фінал.
Акрамя Гуськовай, медалі ў лыжнай акрабатыцы для Беларусі на Алімпійскіх гульнях заваёўвалі Дзмітрый Дашчынскі (3-е месца ў 1998 і 2-е ў 2006 гадах), Аляксей Грышын (3-е ў 2002-м, 1-е ў 2010-м), Ала Цупер і Антон Кушнір (1-е ў 2014-м).
Таксама 18 лютага стала вядома, што беларуская фігурыстка Вікторыя Сафонава не здолела кваліфікавацца ў фінал, заняўшы 26-е месца. У адвольнай праграме 19 лютага выступяць 24 фігурысткі.
Раней без медалёў завяршыла выступленні на Алімпіядзе лыжніца Ганна Каралёва.
Беларуска Марыя Шканава заняла 37-е месца (з 95) у слаламе 18 лютага.
21 лютага ў мас-старце выступіць беларуская канькабежка Марына Зуева.
Калі Зуева не зможа падняцца на п’едэстал (яе шанцы ацэньваюцца скептычна), беларускія спартсмены, якія выступаюць сёлета ў нейтральным статусе, упершыню пасля здабыцця краінай незалежнасці застануцца без медалёў на зімовых Алімпіядах.
Зімовыя Алімпійскія гульні праходзяць з 6 па 22 лютага 2026 года ў італьянскіх гарадах Мілан і Корціна-д’Ампеца. Дазвол удзельнічаць у іх атрымалі восем згаданых спартсменак.
