У студзені 2026-га пабудавана жылля на 39% менш, чым годам раней
18 лютага, Позірк. У студзені 2026 года ў эксплуатацыю ўведзена 162,3 тыс. квадратных метраў агульнай плошчы жылля — на 39% менш, чым у першы месяц 2025-га, паведамляе Нацыянальны статыстычны камітэт.
Пры гэтым з дзяржпадтрымкай для маючых патрэбу ў паляпшэнні ўмоў уведзена 31,6 тыс. кв. м жылля (-14,3%).
У 2026 годзе ў Беларусі з дзяржаўнай падтрымкай павінна быць пабудавана 238,3 тыс. квадратных метраў жылля, вынікае з пастановы Савета міністраў, аб падпісанні якой 6 студзеня паведаміла прэс-служба ўрада.
Дакументам устаноўленыя заданні па будаўніцтве жылля па дзяржаўным заказе — 407,4 тыс. кв. м; арэнднага жылля — 650 тыс. кв. м; жылля, у якім для ацяплення, гарачага водазабеспячэння і прыгатавання ежы выкарыстоўваецца электраэнергія — 315 тыс. кв. м; жылых памяшканняў сацыяльнага карыстання — 22,9 тыс. кв. м.
Акрамя таго, пастанова прадугледжвае, што 5,93 тыс. шматдзетных сем’яў павінны быць забяспечаныя жыллём у адпаведнасці з патрабаваннем аб накіраванні такіх сем’яў на паляпшэнне жыллёвых умоў на працягу аднаго года з дня пастаноўкі на ўлік у якасці маючых патрэбу.
Чакаецца, што на будаўніцтва інфраструктуры да жылля будзе выдзелена 1 млрд 341 млн 908 тыс.рублёў.
Будаўніцтва арэнднага жылля ўваходзіць у пяцёрку галоўных прыярытэтаў урада на 2026–2030 гады. Як раней заяўляў міністр эканомікі Юрый Чабатар, па арэндным жыллі “ўся заканадаўчая база ўжо ў гэтым годзе створана”: “Людзі ведаюць, на якіх падставах, на якіх правілах можна будзе [яго] выкупляць. Адпаведны ўказ прыняты. Указ прыняты і аб тым, на якіх умовах прадпрыемствы будуць крэдытавацца для стварэння свайго арэнднага жыллёвага фонду”.
У 2025-м было ўведзена ў эксплуатацыю 4 млн 573,6 тыс. кв. м, 2024-м — 4 млн 390,5 тыс., 2023-м — 4 млн 195 тыс. 92, 2022-м — 4 млн 222 тыс. 619.
