Віленскі аэрапорт быў зачынены на гадзіну з-за шароў з Беларусі

18 лютага, Позірк. Вільнюскі аэрапорт 17 лютага з 20:30 да 21:30 (з 21:30 да 22:30 паводле мінскага часу) спыняў працу “праз паветраную кантрабанду, якую рэжым Аляксандра Лукашэнкі выкарыстоўвае ў якасці гібрыднай атакі супраць Літвы гібрыднай атакі з боку Беларусі“, паведаміў партал Delfi са спасылкай на Нацыянальны цэнтр кіравання крызісамі Літвы.

Паводле звестак партала, самалёт з Тэнэрыфе быў накіраваны ў аэрапорт Каўнаса.

Апошні раз аэрапорт Вільнюса быў зачынены на 1 гадзіну 19 хвілін 27 студзеня пасля ўвядзення абмежавання на палёты праз “гібрыдную атаку супраць Літвы, грамадзянскай авіяцыі і грамадства“ з боку Беларусі.

Уварванне паветраных шароў з кантрабанднымі цыгарэтамі з Беларусі ў Літву восенню і ў пачатку снежня 2025 года стала прычынай неаднаразовага закрыцця Вільнюскага аэрапорта, размешчанага недалёка ад мяжы. Акрамя таго, з 29 кастрычніка па 19 лістапада Літва практычна цалкам закрывала мяжу з Беларуссю.

Летась 9 снежняга года ўрад Літвы абвясціў экстрэмальную сітуацыю дзяржаўнага ўзроўню праз “гібрыдную атаку Беларусі”. Пастанова была прынятая“ ў сувязі з пагрозай нацыянальнай бяспецы дзяржавы і небяспекай для жыцця і здароўя людзей, а таксама для маёмасці і (або) навакольнага асяроддзя, стваранага тым, што на тэрыторыю Літвы з Беларусі запускаюцца паветраныя шары, якія перавозяць кантрабанду”.

Спецыяльны пасланнік прэзідэнта ЗША Дональда Трампа па Беларусі Джон Коўл па вяртанні ў Вільнюс з Мінска, дзе 12 і 13 снежня праводзіў перамовы з Аляксандрам Лукашэнкам, заявіў, што апошні паабяцаў яму садзейнічаць у спыненні палётаў метэазондаў з Беларусі ў Літву.