За мінулы тыдзень правам бязвізавага ўезду ў Беларусь скарысталіся 3.259 еўрапейцаў

16 лютага, Позірк. З 9 па 16 лютага ў бязвізавым парадку ў Беларусь уехала 3.259 грамадзян еўрапейскіх дзяржаў (тыднем раней — 2.441), сведчыць праведзены “Позіркам” аналіз даных Дзяржаўнага пагранічнага камітэта.

За апошні тыдзень у Беларусь прыбыло 1.345 грамадзян Літвы (797), 763 грамадзяніны і неграмадзяніны Латвіі (627), 675 грамадзян Польшчы (531), 476 грамадзян іншых еўрапейскіх дзяржаў са спісу пашыранага бязвізу (486).

З сярэдзіны вясны 2022 года Беларусь наведала 1.274.079 жыхароў Еўропы. З Латвіі прыбыло 409.366 замежнікаў, Літвы — 668.090, Польшчы — 136.029. У рамках пашыранага бязвізу для 35 еўрапейскіх дзяржаў з сярэдзіны ліпеня 2024 года ў Беларусь уехала 60.594 чалавекі.

Для жыхароў Літвы і Латвіі бязвізавы рэжым дзейнічае з 15 красавіка 2022 года, Польшчы — з 1 ліпеня таго ж года, яшчэ 35 краін Еўропы — з 19 ліпеня 2024-га.

9 снежня 2025 года Аляксандр Лукашэнка падоўжыў бязвізавы ўезд для грамадзян 38 еўрапейскіх краін да 31 снежня 2026 года ўключна.

Пашыраны бязвіз тычыцца жыхароў Андоры, Аўстрыі, Бельгіі, Балгарыі, Босніі і Герцагавіны, Ватыкана, Венгрыі, Вялікабрытаніі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Люксембурга, Ліхтэнштэйна, Мальты, Манака, Нарвегіі, Нідэрландаў, Партугаліі, Паўночнай Македоніі, Румыніі, Сан-Марына, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.