Прадстаўнік МЗС РФ “па-таварыску” заклікаў “беларускіх сяброў” захоўваць пільнасць у стасунках з ЗША

15 лютага, Позірк. Масква вітае “любыя канструктыўныя пачынанні ў кантэксце нармалізацыі беларуска-амерыканскага дыялогу і скасавання незаконных абмежавальных мер“, але “па-таварыску“ заклікае “беларускіх сяброў“ захоўваць пільнасць. Такую заяву зрабіў намеснік міністра замежных спраў Расіі Міхаіл Галузін у інтэрв’ю расійскаму інфармацыйнаму агенцтву ТАСС.

“У такім кантэксце цэнім публічныя заявы прэзідэнта Беларусі Аляксандра Лукашэнкі пра тое, што “вялікая ўгода“ Мінска з Вашынгтонам магчымая выключна пры ўліку нацыянальных інтарэсаў Рэспублікі Беларусь і адсутнасці шкоды яе супрацоўніцтву з ключавымі саюзнікамі — Расіяй і Кітаем”, — сказаў прадстаўнік МЗС РФ.

“Зрэшты, упэўненыя, — працягнуў ён, — што з улікам асаблівага характару расійска-беларускіх стасункаў любыя спробы недружалюбных дзяржаў знайсці “зазоры“ ў нашых пазіцыях у міжнародных справах застануцца бясплоднымі”.

Галузін назваў “безумоўна, добрымі навінамі” выключэнне ў лістападзе 2025 года адміністрацыяй Дональда Трампа авіякампаніі “Белавія“ з “чорных спісаў“ Міністэрства фінансаў ЗША, а таксама “ліквідацыю псеўдаправавых бар’ераў на шляху ажыццяўлення палётаў у большасць рэгіёнаў Расіі, якая з’яўляецца галоўным рынкам для дадзенага авіяперавозчыка“.

“Хацелася б спадзявацца, што названыя крокі будуць дапоўненыя і вяртаннем Вашынгтонам усіх незаконна замарожаных раней актываў беларускай кампаніі“, — заявіў Галузін.

Пры гэтым у інтэрв’ю не згадана, што санкцыі часткова знятыя пасля вызвалення (з наступнай высылкай з краіны) Аляксандрам Лукашэнкам групы палітвязняў.

Прадстаўнік МЗС РФ адзначыў, што “агулам маштабны санкцыйны рэжым супраць Беларусі працягвае дзейнічаць”. “Па-ранейшаму маюць моц і амерыканскія экспартна-кантрольныя абмежаванні, якія закранаюць авіясектар. У прыватнасці, дазволена эксплуатаваць толькі восем вузкафюзеляжных лайнераў “Боінг-737”. Пры гэтым атрыманне любой амерыканскай запчасткі і агрэгата ў выпадку раптоўнай паломкі запатрабуе асобнага ўзгаднення з “рэгулятарамі“. Нягледзячы на гэты “крок насустрач Мінску“, які выпінаецца напаказ амерыканскім бокам, адміністрацыя ЗША пакуль не адмаўляецца ад палітыкі ціску на Беларусь“, — заявіў намеснік кіраўніка знешнепалітычнага ведамства РФ.

На яго думку, Белы дом “гатовы задзейнічаць рычагі эканамічнага ўздзеяння ў любы патрэбны яму момант, пагражаючы скасаваннем паслабленняў і вяртаннем рэстрыкцый“. “Акрамя таго, прадпрынятая мера не вядзе да вырашэння праблемы паўнавартаснага аднаўлення паветраных зносін і адмовы “калектыўнага Захаду” ад стратэгіі транспартнай блакады нашых краін. І ўжо сапраўды не мае ніякага дачынення да палягчэння сітуацыі ў сферы забеспячэння бяспекі палётаў грамадзянскай авіяцыі“, — лічыць Галузін.

Раней Лукашэнка, у адрозненне ад прэзідэнта РФ Уладзіміра Пуціна, прыняў прапанову Трампа аб уваходжанні ў створаны ім “Савет міру”, аднак адмовіўся ляцець у Вашынгтон на першы саміт арганізацыі. Прэс-сакратар Лукашэнкі Наталля Эйсмант спаслалася на позняе запрашэнне і цяжкасці з пералётам “з улікам закрыцця паветранай прасторы над ЕС“. Пры гэтым як будзе дабірацца ў ЗША Рыжанкоў, яна не патлумачыла.