У Польшчы затрымана восем чалавек па справе аб паветранай кантрабандзе цыгарэт з Беларусі

13 лютага, Позірк. Восем чалавек, якія, як сцвярджаецца, займаліся кантрабандай цыгарэт з Беларусі з дапамогай паветраных шароў, затрымана сіламі супрацоўнікаў Падляскага аддзела Памежнай аховы Польшчы.

Паводле інфармацыі ведамства, гэта чацвёра польскіх грамадзян ва ўзросце ад 22 да 44 гадоў, а таксама чацвёра грамадзян Літвы ва ўзросце ад 30 да 34 гадоў.

Затрыманым выстаўленыя абвінавачанні ў кантрабандзе тытунёвых вырабаў, а таксама ў рамках закона аб спецыяльных захадах па супрацьдзеянні падтрымцы агрэсіі супраць Украіны. За інкрымінаваныя дзеянні прадугледжанае пакаранне ў выглядзе пазбаўлення волі на тэрмін не менш за 3 гады.

Чатыры літоўскія грамадзяніны і адзін грамадзянін Польшчы на падставе рашэння суда арыштаваныя на 3 месяцы, астатнім у якасці меры стрымання прызначаны паліцэйскі нагляд і забарона на выезд з краіны.

Згодна з данымі ведамства, арыентавальны агульны кошт выяўленых ад пачатку года цыгарэт, што былі нелегальна дастаўленыя з Беларусі па паветры, перавышае 2,8 млн злотых (каля 784 тыс. долараў). Агулам па справе аб паветранай кантрабандзе затрымана 16 чалавек.

9 лютага на прэс-канферэнцыі ў Варшаве віцэ-прэм’ер, міністр абароны Польшчы Уладзіслаў Касіняк-Камыш назваў запуск метэазондаў з Беларусі “гібрыднай вайной”. Чыноўнік таксама паведаміў, што сярэдняя цана кантрабанды, якая перамяшчаецца адным шарам, складае каля 30 тыс. злотых (на той момант 8,5 тыс. долараў).

З канца мінулага месяца Польшча зафіксавала шэсць серый парушэнняў паветранай прасторы з боку Беларусі (28 студзеня, 31 студзеня, 1 лютага і 2 лютага польскія вайскоўцы ад пачатку пазначалі кірунак руху; 4 лютага і 9 лютага пра кірунак пасля заяўлялі чыноўнікі). Ва ўсіх гэтых выпадках у аб’ектах, што ўварваліся, распазнавалі аэрастаты, з дапамогай якіх дастаўляюцца кантрабандныя грузы.