На кантрольныя заняткі выведзеныя ракетныя сістэмы “Паланэз-М” і “Іскандэр-М”
13 лютага, Позірк. Разлікі рэактыўных сістэм залпавага агню “Паланэз-М” і аператыўна-тактычнага ракетнага комплексу “Іскандэр-М” выведзеныя на кантрольныя заняткі па кіраванні ракетнымі ўдарамі, паведаміла 13 лютага прэс-служба Міністэрства абароны.
Адзначаецца, што заняткі праходзяць “на розных участках мясцовасці, у тым ліку на значным аддаленні ад пунктаў пастаяннай дыслакацыі”.
Начальнік ракетных войскаў і артылерыі Узброеных сіл — кіраўнік адпаведнага ўпраўлення Генеральнага штаба УС Руслан Чэхаў заявіў, што да заняткаў прыцягнута некалькі частак ракетных войскаў. Паводле яго слоў, “было шмат перамяшчэнняў”, вайскоўцы здзейснілі “марш на вялікія адлегласці — да 300 кіламетраў”, пры гэтым няладу тэхнікі “не было”.
Каментуючы частку заняткаў, якая ўжо адбылася, военачальнік паведаміў, што яна была насычаная “дзеяннямі дыверсійна-выведніцкіх груп умоўнага праціўніка”, праходзіла ва ўмовах “складанага радыёэлектроннага становішча”. У рамках гэтай трэніроўкі, паводле яго слоў, адпрацаванае “вядзенне баявых дзеянняў ва ўмовах уздзеяння сродкаў беспілотнай авіяцыі праціўніка, у тым ліку FPV-дронаў”.
Баявыя пускі ажыццяўляліся ўдзень, уначы, у складаных умовах надвор’я, адзначыў Чэхаў.
Расійскі комплекс “Іскандэр-М”, які стаіць на ўзбраенні Беларусі, можа аснашчацца як звычайнымі, так і ядзернымі баявымі часткамі. Беларуская сістэма “Паланэз-М” разлічаная на звычайную частку, аднак летам 2025 года генеральны сакратар Савета бяспекі Аляксандр Вальфовіч заяўляў, што разглядаецца пытанне яе аснашчэння ядзернымі зарадамі.
12 лютага ведамства паведаміла, што на занятках адпрацоўваюцца пытанні падрыхтоўкі і вядзення баявых дзеянняў ракетных войскаў, а таксама выкананне навучальна-баявых задач па нанясенні ракетных удараў у дзённы і начны час сутак.
16 студзеня пачалася раптоўная праверка боегатоўнасці. Вальфовіч заявіў, што яна праводзіцца паводле новай сістэмы: ён асабіста — у абыход міністра абароны — уручыў камандзіру адной з мехбрыгад распараджэнне прывесці вайсковую часць у баявую гатоўнасць.
26 студзеня Аляксандр Лукашэнка анансаваў, што праверка будзе праходзіць да вясны.
У той жа дзень міністр абароны Віктар Хрэнін абвясціў пра пачатак яшчэ адной праверкі боегатоўнасці вайсковых часцей і падраздзяленняў — планавай.
У 2025 годзе ва Узброеныя сілы пастаўлена 5,2 тыс. адзінак новых узораў узбраення, вайсковай і спецыяльнай тэхнікі і дапаможнага абсталявання, а таксама 75 тыс. адзінак боепрыпасаў. Такія даныя былі прыведзеныя 6 лютага на калегіі Дзяржаўнага ваенна-прамысловага камітэта.
За кошт паставак з РФ Беларусі атрымалася істотна нарасціць баявы патэнцыял Узброеных сіл, заявіў намеснік міністра абароны па ўзбраенні Андрэй Федзін з інтэрв’ю праграме “Арсенал” на тэлеканале “Беларусь 1” 8 лютага.
Улады ў Мінску практычна бесперапынна праводзіць вучэнні, трэніроўкі, зборы на фоне абвастрэння стасункаў з Захадам (акрамя ЗША пасля прыходу да ўлады прэзідэнта Дональда Трампа) і поўнамаштабнай вайны Расіі супраць Украіны.
