Дзяржінспекцыя працы зможа патрабаваць ліквідацыі парушэнняў па выплаце не толькі зарплаты, але і ўзнагароджанняў
12 лютага, Позірк. Дэпартамент дзяржінспекцыі працы надзелены правам “вынясення абавязковых для выканання патрабаванняў аб ліквідацыі парушэнняў” пры выяўленні фактаў нявыплаты не толькі зарплаты, але і ўзнагароджанняў па дагаворах. Адпаведнае палажэнне ўтрымліваецца ва ўказе, які 12 лютага падпісаў Аляксандр Лукашэнка.
Як паведамляе яго прэс-служба, пры невыкананні суб’ектамі гаспадарання гэтых патрабаванняў спагнанне такіх выплат будзе ажыццяўляцца ў пазасудовым парадку.
Для гэтага дэпартамент будзе падаваць у органы прымусовага выканання “прадстаўленне аб узбуджэнні выканаўчай вытворчасці ў інтарэсах грамадзяніна”.
Акрамя таго, павялічваецца памер пазачарговых плацяжоў, якія ўтрымліваюцца з наймальнікаў для пагашэння запазычанасці па выплаце заработнай платы, — з 1,5 да 3 бюджэтаў пражытачнага мінімуму (з 1 лютага па 30 красавіка 2026 года БПМ складае 496,96 рубля, такім чынам, гаворка ідзе пра суму 1.490, 88 рубля).
Праект дакумента абмяркоўваўся на нарадзе ў Лукашэнкі 6 лютага. Як адзначыў дзяржСМІ пасля мерапрыемства міністр працы і сацыяльнай абароны Андрэй Лабовіч, разам з павелічэннем колькасці работнікаў па грамадзянска-прававых дагаворах стала больш і зваротаў грамадзян па пытаннях нявыплаты ўзнагароджання.
“Адпаведна, наспела неабходнасць урэгуляваць і ў рамках грамадзянска-прававых дагавораў пытанні нявыплаты ўзнагароджання па аналогіі з нявыплатай заработнай платы”, — падкрэсліў кіраўнік ведамства.
