У Мінску працягваюць выключаць вулічнае асвятленне ў больш ранні час

10 лютага, Позірк. У Мінску працягваецца практыка больш ранняга выключэння вулічнага асвятлення раніцай.

10 лютага гэта было зроблена ў 8:11 — за паўгадзіны да ўзыходу сонца.

Увечары ліхтары былі ўключаныя ў 18:28 — праз 20 хвілін пасля заходу сонца.

3 лютага ў Мінску на нарадзе па пытаннях сацыяльна-эканамічнага развіцця Віцебскай вобласці Аляксандр Лукашэнка запатрабаваў ад падначаленых “скарэктаваць рэжым асвятлення на вуліцах”.

“Выеду ў Астрашыцкім Гарадку (пасёлак у Мінскім раёне, побач з якім знаходзіцца рэзідэнцыя Лукашэнкі. — “Позірк”.), да прыкладу, і ў іншых вёсках. Учора ў 6 гадзін вечара ўся Мінская вобласць свеціцца. Гараць агні. <…> Усе на вуліцах ліхтары ўключаныя, усё ззяе. Мінская вобласць і далей — усё гарыць. У шэсць гадзін вечара. Навошта? Ужо ў палову на восьмую можна адключыць раніцай святло на вуліцы, асабліва цяпер, калі святла шмат. Не — усе ліхтары гараць”, — цытавала прамоўцу яго прэс-служба.

“Наракайце самі на сябе. Будзеце плаціць мінімум са сваёй кішэні”, — сказаў ён чыноўнікам.

Паводле слоў Лукашэнкі, яму даклалі пра “некарэктную працу фотаэлементаў”. “Лухта поўная. Адрэгулюйце гэтыя фотаэлементы, каб электрычнасць аўтаматычна з вашым штучным інтэлектам адключалася ў 7 гадзін раніцы. І загаралася святло не ў 6 гадзін вечара, а ў 8. Палічыце — 4–5 гадзін [лішніх] гарыць уся краіна, свеціцца. Колькі мы марнуем грошай! Вось вашы падыходы”, — дадаў Лукашэнка.

На яго думку, з такім падыходам чыноўнікі “краіну хочуць давесці да вайны”: “Ну дык майце на ўвазе, што нам жа наперадзе давядзецца ісці. Вам у штурмавых атрадах давядзецца”.

4 лютага ў Міністэрстве энергетыкі прайшла нарада, на якой абмяркоўвалася “карэкціроўка рэжымаў работы вулічнага асвятлення ў населеных пунктах”.

Увечары вулічныя ліхтары ў Мінску загарэліся прыкладна ў 19:00, калі ўжо было цёмна, што выклікала негатыўную рэакцыю насельніцтва. У каментарыях прыводзілася параўнанне з Украінай, энергетычную сістэму якой атакуе Расія.

Раніцай 5 лютага асвятленне было выключана раней, увечары — уключана ў звычайны час.

На нарадзе з урадам 6 лютага Лукашэнка даў зразумець, што яго задаволіць хаця б выключэнне святла раніцай на 10–15 хвілін раней за час: “[Старшыня Мінгарвыканкама Уладзімір] Кухараў на пятнаццаць хвілін або на дзесяць нават святло выключыў раней — божа мой, з Украінай параўналі. Дзесяць хвілін! А ніхто не палічыў, што гэтыя дзесяць-пятнаццаць хвілін [адсутнасці асвятлення], як Уладзімір Яўгенавіч кажа, па годзе даюць тры малочна-таварныя комплексы па кошце і сем прафілакторыяў для цялят, як модна цяпер казаць”.