Мэрыя Варшавы падтрымае беларусаў у Дзень Волі — АПК
Дзень Волі ў Варшаве ў 2025 годзе
6 лютага, Позірк. Падтрымаць беларусаў у Дзень Волі, які адзначаецца 25 сакавіка, абяцалі ўлады Варшавы, паведамляе Аб’яднаны пераходны кабінет (АПК).
“Пацвярджаем, што асвятлім фасад Палаца культуры і навукі ў колеры свабоднай Беларусі”, — гаворыцца ў адказе мэрыі на зварот намесніка кіраўніка АПК, кіраўніка Народнага антыкрызіснага ўпраўлення (НАУ) Паўла Латушкі.
Адзначаецца, што ў сваім лісце ў мэрыю Варшавы Латушка падзякаваў мэру Рафалу Тшаскоўскаму за “паслядоўную падтрымку дэмакратычных памкненняў беларусаў, а таксама за дапамогу, якую сталіца Польшчы надае беларускам і беларусам, вымушаным з палітычных прычын пакінуць радзіму”.
“Пацвярджаем нашу салідарнасць з беларускім дэмакратычным рухам і рады, што Дзень Волі будзе адзначацца і ў Варшаве”, — таксама гаворыцца ў пасланні ў адказ варшаўскіх уладаў.
“Тое, што ў польскай сталіцы зноў зазіхацяць нашыя нацыянальныя колеры, з’яўляецца важным жэстам салідарнасці. Падтрымка нашай дзейнасці з боку Польшчы яшчэ раз падкрэслівае прыхільнасць суседняй краіны да дэмакратычных каштоўнасцяў і салідарнасць з беларускім грамадствам”, — адзначыў Латушка.
25 сакавіка дэмакратычна настроеная частка насельніцтва Беларусі святкуе Дзень Волі — гадавіну абвяшчэння Беларускай Народнай Рэспублікі (БНР) у 1918 годзе.
У Беларусі гэтая дата афіцыйна не адзначаецца. Пасля прэзідэнцкіх выбараў 2020 года любыя спробы публічна адзначыць Дзень Волі заканчаюцца затрыманнямі і наступнымі судамі, як мінімум паводле адміністрацыйных абвінавачанняў. Гістарычныя падзеі, звязаныя з БНР, паслядоўна дэманізуюцца дзяржпрапагандай. Нацыянальныя сімвалы названыя “калабарацыянісцкімі”, “нацысцкімі” і фактычна абвешчаныя па-за законам. Значэнне БНР для беларускай дзяржаўнасці лічыцца перабольшаным, а сама рэспубліка пазіцыянуецца як “марыянеткавае” ўтварэнне, створанае пад германскім пратэктаратам у завяршальнай фазе Першай сусветнай вайны.
Пасля падзей 2020 года Дзень Волі беларусы ў асноўным адзначаюць за мяжой. Акцыі праводзяцца ў розных краінах.
Ціханоўская ў Дзень Волі: Як бы нас ні затыкалі, мы кажам: "Жыве Беларусь!"
25 сакавіка, Позірк. Беларусы "з цеплынёй берагуць у сэрцах дату 25 сакавіка — дзень абвяшчэння незалежнасці Беларускай Народнай Рэспублікі", адзначыла ў відэавіншаванні з нагоды свята дэмакратычны лідар Святлана Ціханоўская. Паводле палітыка, гэта дзень, "калі Беларусь выйшла з ценю імперыі-захопніка": "Дзень, калі наш …
