5 лютага, Позірк. Украіна і Расія правялі чарговы, першы сёлета абмен палоннымі праз тэрыторыю Беларусі — па 157 чалавек з абодвух бакоў.
Як паведамляе прэс-служба прэзідэнта Украіны Уладзіміра Зяленскага, з РФ перададзена 157 вайскоўцаў Узброеных сіл Украіны, Нацыянальнай гвардыі, Дзяржаўнай памежнай службы. Большасць знаходзіліся ў палоне яшчэ з 2022 года.
“Сённяшні абмен адбыўся пасля доўгай паўзы, і вельмі важна, што яго ўдалося рэалізаваць. Дзякуй усім, хто працуе дзеля абменаў, і ўсім, хто на фронце папаўняе абменны фонд для Украіны. Без рашучасці нашых воінаў такія абмены былі б немагчымымі, таму кожны вынік нашых падраздзяленняў — гэта тое, што падтрымлівае і магчымасць вяртаць украінцаў дадому з Расеі“, — адзначыў Зяленскі.
Міністэрства абароны Расіі паведаміла, што акрамя вайскоўцаў “вернутыя трое грамадзян Расійскай Федэрацыі — жыхароў Курскай вобласці, якія незаконна ўтрымліваліся кіеўскім рэжымам і будуць дастаўленыя дадому“.
Паводле звестак расійскага ваеннага ведамства, вайскоўцы РФ знаходзяцца на тэрыторыі Беларусі, ім надаецца псіхалагічная і медыцынская дапамога.
Падкрэсліваецца, што “пры вяртанні расійскіх вайскоўцаў з палону пасрэдніцкія намаганні гуманітарнага характару здзейснілі Аб’яднаныя Арабскія Эміраты і ЗША”.
Апошні раз Кіеў і Масква абмяняліся ваеннапалоннымі з выкарыстаннем тэрыторыі Беларусі 2 кастрычніка 2025 года (па 185 вайскоўцаў і па 20 грамадзянскіх асоб). Летась Украіна і РФ правялі 18, а ў 2024-м — 12 этапаў абмену палоннымі.
Акрамя таго, пяць сем’яў з Расіі і пяць з Украіны ўз’ядналіся са сваімі блізкімі 4 верасня на беларуска-ўкраінскай мяжы пры пасярэдніцтве ўпаўнаважанага ў правах чалавека ў Расіі Таццяны Маскальковай.
Старшыня КДБ Беларусі Іван Церцель у інтэрв’ю беларускаму дзяржаўнаму тэлебачанню (выйшла ў эфір 22 чэрвеня 2025 года) заявіў, што на той момант на тэрыторыі краіны было праведзена 38 аперацый абмену паміж Украінай і Расіяй.
Беларусь — адзіная краіна, што мае непарыўную мяжу як з РФ, так і з Украінай.
24 лютага 2022 года РФ пры непасрэднай падтрымцы рэжыму ў Мінску пачала поўнамаштабную вайну з Украінай, уварваўшыся ў тым ліку з беларускай тэрыторыі.
