За мінулы тыдзень 20 грамадзян Беларусі добраахвотна пакінулі Польшчу на патрабаванне яе ўладаў

2 лютага, Позірк. Больш за 160 замежнікаў пакінула Польшчу з 26 студзеня да 1 лютага на патрабаванне ўладаў гэтай краіны, вынікае з паведамлення прэс-службы польскай Памежная аховы.

Сярод іншых добраахвотна Польшчу пакінулі 20 грамадзян Беларусі (двума тыднямі раней — 16), 20 грамадзян Грузіі, 18 — Малдовы; прымусова — 28 украінцаў, 8 грузінаў і 4 малдаваніна.

Сцвярджаецца, што ў ліку высланых за мінулы тыдзень былі асобы, асуджаныя за захоўванне наркотыкаў, шматлікія крадзяжы і кіраванне ў нецвярозым стане. Некаторыя з гэтых асоб таксама абвінавачваліся ў абразе службовай асобы, парушэнні яе асабістай недатыкальнасці і пагрозах, гвалце ў дачыненні да блізкага сваяка, падробцы штампа памежнага кантролю і ўдзеле ў злачыннай групе.

У 2025 годзе Памежная ахова Польшчы выканала больш за 9,4 тыс. рашэнняў, якія прадпісваюць замежнікам пакінуць тэрыторыю краіны ў добраахвотным або прымусовым парадку, паведамляў раней партал Onet.pl, які атрымаў адпаведныя даныя ў адказ на свой зварот у ведамства.

Грамадзян Беларусі тычылася амаль 1,3 тыс. (медыя аперавала прыблізнымі лічбамі), ці крыху менш за 14% усіх рашэнняў. Адзначалася, што з гэтай колькасці “каля 130” беларусаў было выслана прымусова (прыкладна 10%).

Згодна з прадстаўленымі ў матэрыяле данымі, за 2024 год (у гэтым выпадку выкарыстаныя дакладныя лічбы) з Польшчы дэпартавалі 1.377 грамадзян Беларусі, у тым ліку ў прымусовым парадку — 66.

Такім чынам, агульная колькасць высланых з польскай тэрыторыі беларусаў у гадавым вымярэнні крыху знізілася, але колькасць прымусова дэпартаваных вырасла прыкладна ўдвая.

На кастрычнік 2025 года ў Польшчы было легалізавана сама меней 146 тыс. грамадзян Беларусі, заявіла 12 снежня 2025 года ў Вільнюсе юрыст Алеся Пажыток, які спецыялізуецца на міграцыйным праве.

Эксперт падкрэсліла, што гэтыя даныя не ўлічваюць беларусаў, якія знаходзяцца ў краіне на падставе віз, знаходзяцца ў чаканні дазволу на жыхарства або рашэння пра наданне міжнароднай абароны.

Спаслаўшыся на даныя афіцыйнай статыстыкі, яна адзначыла, што часовы дазвол на жыхарства ў Польшчы на ​​кастрычнік мела каля 91 тыс. беларусаў (на гуманітарных падставах, паводле працы, навучання, уз’яднання сям’і, прадпрымальніцтва ды інш.), сталы — каля 42 тыс. (з улікам асоб, якія мелі сталае месца жыхарства да 2020 года, а таксама пасля 2020-га, але з “картамі паляка”, польскімі каранямі ды інш.).