Літва заявіла, што пакідае за сабой права зноў абмежаваць памежны рух з Беларуссю

28 студзеня, Позірк. “Рашучы пратэст” Беларусі ў сувязі з парушэннямі паветранай прасторы Літвы 27-28 студзеня 2026 года з выкарыстаннем паветраных шароў для перавозкі кантрабанды быў заяўлены ў ноце, уручанай, паводле інфармацыі МЗС балтыйскай дзяржавы, 28 студзеня часоваму паверанаму ў справах Беларусі.

У ноце адзначана, што “гэтыя дзеянні стварылі пагрозу бяспецы грамадзянскай авіяцыі, тройчы прыпынілі працу Вільнюскага міжнароднага аэрапорта, закранулі 5 рэйсаў і парушылі паездкі 700 пасажыраў.

Падкрэслена, што “такія парушэнні паветранай прасторы Літвы з боку Беларусі разглядаюцца як сур’ёзныя парушэнні міжнароднага права, якія ствараюць пагрозу бяспецы Літвы і грамадзянскай авіяцыі”.

Дыпламату “было заяўлена, што Беларусь павінна неадкладна спыніць падобныя парушэнні і выконваць міжнародныя абавязацельствы па кантролі за паветранай прасторай і дзяржаўнай мяжой“.

Адзначана, што пры паўтарэнні падобных інцыдэнтаў Літва “пакідае за сабой права аднавіць абмежаванні прыгранічнага руху або ўжыць іншыя меры для абароны паветранай прасторы, гарантавання бяспекі грамадзянскай авіяцыі і нейтралізацыі пагроз нацыянальнай бяспецы“.

Як паведамляў “Позірк“, кіраўнік Нацыянальнага цэнтра кіравання крызісамі Літвы Вілмантас Віткаўскас заявіў 28 студзеня аб масіраванай атацы мінулай ноччу метэазондамі з боку Беларусі. Гэтую ноч ён назваў “верагодна, найбольш інтэнсіўнай за ўвесь гэты год (з пачатку 2026-га. — “Позірк“.)”.

Апошні раз да гэтага праца аэрапорта прыпынялася летась 6 снежня.

Уварванне паветраных шароў з кантрабанднымі цыгарэтамі з Беларусі ў Літву восенню і на пачатку снежня 2025 года стала прычынай неаднаразовага закрыцця вільнюскага аэрапорта, размешчанага недалёка ад мяжы. Акрамя таго, з 29 кастрычніка па 19 лістапада Літва закрывала мяжу з Беларуссю.

9 снежня мінулага года ўрад Літвы аб’явіў экстрэмальную сітуацыю дзяржаўнага ўзроўню з-за “гібрыднай атакі Беларусі“. Рашэнне было прынята “ў сувязі з працягам пагрозы нацыянальнай бяспецы дзяржавы і небяспекай для жыцця і здароўя людзей, а таксама для маёмасці і (або) навакольнага асяроддзя, якая ствараецца тым, што на тэрыторыю Літвы з Беларусі запускаюцца паветраныя шары, якія перавозяць кантрабанду“.

Спецыяльны пасланнік прэзідэнта ЗША Дональда Трампа па Беларусі Джон Коўл па вяртанні ў Вільнюс з Мінска, дзе 12 і 13 снежня праводзіў перамовы з Аляксандрам Лукашэнкам, заявіў, што апошні паабяцаў яму садзейнічаць у спыненні палётаў метэазондаў з Беларусі ў Літву.

20 студзеня галоўны дарадца літоўскага прэзідэнта Дэйвідас Матулёніс заявіў, што досыць доўгі час Літва амаль не фіксуе сур’ёзнага наплыву кантрабандысцкіх паветраных шароў з Беларусі, сітуацыя “значна палепшылася“.

Апошні раз да сённяшняга выпадку кіраўнік беларускай амбасады ў Вільнюсе запрашаўся ў МЗС Літвы для ўручэння ноты пратэсту 9 снежня мінулага года.