Беларусь заняла шостае месца на тэрыторыі былога СССР па росце спажывецкіх цэн у 2025 годзе

28 студзеня, Позірк. Беларусь з паказчыкам 6,83% заняла шостае месца па росце спажывецкіх цэн у 2025 годзе на тэрыторыі былога СССР, сведчыць праведзены “Позіркам” аналіз даных нацыянальных органаў статыстыкі.

Вышэй, чым у Беларусі, інфляцыя ў 2025 годзе была ў Казахстане (12,3%), Кыргызстане (9,4%), Украіне (8%), Узбекістане (7,3%) і Малдове (6,84%).

За Беларуссю — Расія (5,59%), Азербайджан (5,2%), Эстонія (4,1%), Грузія (4%), Латвія, Таджыкістан (па 3,5%), Літва (3,4%) і Арменія (3,3%). Па Туркменістане вядомыя звесткі за першае паўгоддзе (2,9%).

Сярэдняя інфляцыя на тэрыторыі былога СССР у 2025 годзе склала 5,95%.

У снежні спажывецкія цэны ў Беларусі выраслі на 0,32%. Такі ж паказчык зафіксаваны ў Расіі. Гэта 8-е месца пасля Арменіі (+1,22%), Кыргызстана (+1%), Узбекістана (+0,9%), Малдовы (+0,87%), Казахстана (+0,85%), Азербайджана (+0,8%) і Таджыкістана (+0,5%). Менш інфляцыя была ў Украіне (+0,2%). Зніжэнне цэн адзначана ў Латвіі (-0,1%), Літве (таксама -0,1%), Грузіі (-0,2%) і Эстоніі (-0,6%).

Для параўнання: інфляцыя ў Польшчы ў 2025 годзе склала 2,4% (у снежні цэны не змяніліся).

Больш статыстыкі даступна падпісчыкам “Позірк+” (калі спасылка не працуе, карыстайцеся, калі ласка, гэтай)