Ва Украіне затрыманая грамадзянка Беларусі — спецслужбы называюць яе агентам КДБ з журналісцкім прыкрыццём

28 студзеня, Позірк. “Пранікненне агента беларускага КДБ у падраздзяленне Сіл абароны” прадухілілі Служба бяспекі Украіны і Служба ўласнай бяспекі Галоўнага ўпраўлення выведкі Міністэрства абароны, паведаміла 27 студзеня СБУ.

Заяўляецца, што ў выніку “шматэтапнай спецаперацыі” ў Кіеве затрыманая 35-гадовая грамадзянка Беларусі — “глыбока заканспіраваная шпіёнка, якая працавала на КДБ РБ з 2015 года”.

“Згодна з матэрыяламі справы, у 2020 годзе яе накіравалі з Мінска для агентурнай працы ва Украіне, — гаворыцца ў відэаматэрыяле. — На той момант шпіёнка ўжо знаходзілася ў полі зроку СБУ, якая паэтапна дакументавала яе выведніцкую дзейнасць. <…> Яна дзейнічала пад прыкрыццём журналісцкай дзейнасці і некаторы час працавала пазаштатным карэспандэнтам канала “112” Віктара Мядзведчука ў краінах былога СССР. <…> Пасля закрыцця рэсурсаў Мядзведчука КДБ РБ па каардынацыі найвышэйшага вайскова-палітычнага кіраўніцтва Беларусі накіраваў агентку ва Украіну”.

Прыводзяцца некалькі аўдыёфрагментаў (даты запісу не пазначаныя), на якіх, як сцвярджаецца, фігурантка размаўляе з “куратарам ад КДБ РБ”. Чутны жаночы голас: “Мне проста больш пасуе роля выведніка пад прыкрыццём журналіста, вось гэта праўда. Я сапраўды ўмею вельмі добра здабываць інфармацыю”. Ёй адказвае мужчынскі голас (магчымы мантажная склейка): “Уявіце, што вы знаходзіцеся ў доўгатэрміновай камандзіроўцы, і штомесяц… у залежнасці ад таго, як ёсць, я прапаную вам 3 тысячы еўра для пачатку. <…> Праз аднаго чалавека прымае рашэнне вас прыняць самы першы чалавек нашай краіны. <…> Маецца досвед і падтрымка з боку першай асобы нашай краіны”.

СБУ сцвярджае, што яшчэ да пачатку поўнамаштабнай вайны, якую Расія развязала ў лютым 2022 года, “фігурантка ўладкавалася ў адно з вядучых СМІ Украіны”, выкарыстоўвала працу і сувязі калегаў з гэтага медыя “для пашырэння ўласных кантактаў сярод украінскіх палітыкаў, вайскоўцаў і замежных дыпламатаў”.

“Ужо падчас поўнамаштабнага ўварвання куратар агенткі даручыў ёй прыбыць у адну з краін ЕС для дадатковага інструктажу, — заяўляе СБУ. — Пераход мяжы жанчына ажыццяўляла пад выдуманай падставай медыцынскага абследавання. Для кантакту з беларускім супрацоўнікам спецслужбы на тэрыторыі ЕС фігурантка набыла новы смартфон з аднаразовай SIM-картай і пасля гэтага пазбавілася прылады”.

“Падчас інструктажу шпіёнка атрымала заданне збіраць інфармацыю пра грамадзян Рэспублікі Беларусь і Расійскай Федэрацыі, якія дапамагаюць Украіне ў барацьбе з дзяржавай-агрэсарам. Таксама агентка атрымала заданне ад беларускага КДБ усталяваць нефармальныя кантакты з супрацоўнікамі амбасады КНР ва Украіне для збору выведніцкіх даных пра дзейнасць кітайскіх дыпламатаў у нашай краіне. Пасля вяртання ва Украіну агентка паспрабавала ўладкавацца ў адно са штабных падраздзяленняў вайсковай выведкі Украіны, дзе патрапіла пад распрацоўку Службы ўласнай бяспекі ГУВ”, — гаворыцца ў відэаматэрыяле.

Служба бяспекі Украіны заяўляе, што “дзякуючы своечасоваму выкрыццю шпіёнкі” супрацоўнікі СБУ і ГУВ “пачалі з беларускай агенткай доўгатэрміновую аператыўную гульню, якая дазволіла не толькі дакументаваць кожны яе крок, але і праз яе рэгулярна дэзінфармаваць беларускую спецслужбу”.

Паводле сцвярджэння СБУ, “сілы замежнай спецслужбы былі перанакіраваныя на капіяванне імітацыі сакрэтнай інфармацыі”, якая “кантралявана цыркулявала вакол шпіёнкі”.

Заяўлена таксама, што затрыманая спрабавала падбіраць “патэнцыйных кандыдатаў для вярбоўкі ў агентурны апарат КДБ”. СБУ апублікавала размытыя кадры, на якіх, як сцвярджаецца, фігурантка імкнецца “завербаваць ваяра Сіл абароны”. Чутны жаночы голас: “Ты хочаш мне патлумачыць, чалавеку з дзесяцігадовым досведам стажу ў службах, як гэта працуе? Ты хочаш мяне нечаму вучыць? Думаю, што не варта. Табе было патлумачана, чым і як. І цябе ніхто ні да чаго не прымушае. Не хочаш — не трэба. Гэта не КДБ, гэта нашмат вышэй. Ніхто больш мяне ў гэтым жыцці не кране. Асабіста для мяне гэта <…> добра. Цябе ніхто не кране. Гэта проста пад гарантыі разнастайныя, у тым ліку мае асабістыя”.

“Сабраўшы поўную доказную базу на шпіёнку, СБУ ва ўзаемадзеянні з ГУВ МО затрымала яе ля месца пражывання. У фігуранткі канфіскаваныя смартфон і дыктафон, на якія яна фіксавала закрытую інфармацыю. У цяперашні час следчыя СБУ паведамілі ёй пра падазрэнне паводле ч. 1 арт. 114 Крымінальнага артыкула. Гэта шпіянаж. Зламысніца знаходзіцца пад вартай, ёй пагражае да 15 гадоў пазбаўлення волі з канфіскацыяй маёмасці”, — гаворыцца ў відэаматэрыяле.

У матэрыяле не называецца імя затрыманай, відэазапісы знарок скажоныя, фатаграфіі — размытыя. Аднак абрысы на здымках, а таксама дэталі біяграфіі дазваляюць меркаваць, што гаворка пра беларускую журналістку Іну Кардаш. Гэтае ж імя называюць украінскія СМІ, якія распаўсюдзілі інфармацыю пра затрыманне грамадзянкі Беларусі.