На фоне адтоку талентаў за мяжу Лукашэнка заявіў пра акцэнт у навуцы на “захаванні інтэлектуальнага патэнцыялу нацыі”

25 студзеня, Позірк. Беларуская навука “па праву з’яўляецца стратэгічным рэсурсам апераджальнага развіцця і найважнейшай апорай нацыянальнай эканомікі і грамадства”, заявіў Аляксандр Лукашэнка, віншуючы 25 студзеня з прафесійным святам навуковую супольнасць краіны.

“Дзякуючы высокаму прафесіяналізму беларускіх вучоных дасягнутыя значныя поспехі ў галіне космасу і авіяцыі, мікраэлектронікі і атамнай энергетыкі, медыцыны і фармацыі, біятэхналогій і разумнай сельскай гаспадаркі. Гэта сур’ёзны стымул рухацца наперад”, — цытуе віншавальніка яго прэс-служба.

Сёння, паводле слоў Лукашэнкі, перад навуковай супольнасцю “стаяць задачы, звязаныя з рэалізацыяй прыярытэтных напрамкаў навуковай і інавацыйнай дзейнасці, прасоўваннем міждысцыплінарных даследаванняў і ўкараненнем перадавых тэхналогій у практыку”.

“Аднак галоўны акцэнт зроблены на захаванні інтэлектуальнага патэнцыялу нацыі і ўмацаванні тэхналагічнага суверэнітэту, які ў сучасных рэаліях служыць падмуркам незалежнасці і канкурэнтаздольнасці краіны”, — адзначыў палітык.

Паводле яго сцвярджэння, “назапашаны вопыт, пераемнасць і выразная арыентацыя на канкрэтны вынік” дазволяць айчыннай навуцы “дасягнуць пастаўленых мэтаў”.

Адток талентаў за мяжу і недастатковае абнаўленне навуковых кадраў застаюцца праблемамі, якія патрабуюць пільнай увагі. Пра гэта гаворыцца ў артыкуле доктара гістарычных навук прафесара Міхаіла Стральца для навукова-практычнага часопіса “Фінансы. Улік. Аўдыт” (заснавальнікі — Міністэрства фінансаў, Беларускі дзяржаўны эканамічны ўніверсітэт, Беларускі дзяржаўны ўніверсітэт, “Белдзяржстрах”).

“Эксперты падкрэсліваюць неабходнасць павышаць прывабнасць навуковай кар’еры для моладзі”, — адзначае аўтар.

“На сёння пытанне пытанняў — натуральнае старэнне навуковых кадраў, асабліва ў фундаментальных напрамках. Мы можам павялічыць фінансаванне, пабудаваць новыя будынкі і лабараторыі, абсталяваць іх самым перадавым абсталяваннем. Але павінны памятаць пастаянна: хто там будзе працаваць?” — заявіў Лукашэнка 21 лістапада 2025 года на нарадзе па пытаннях развіцця навуковай сферы і дзейнасці Нацыянальнай акадэміі навук.

Лукашэнка рэгулярна крытыкуе працу НАН. 5 жніўня летась ён заявіў аб недастатковай эфектыўнасці работы ўстановы, паведаміўшы пра намер да канца года сустрэцца з “навуковай грамадскасцю” і “абмеркаваць праблемы развіцця навукі”.