Міністр сувязі: Калі вы спажываеце 40 Гб у месяц мабільнага інтэрнэту, варта задумацца, якога зместу кантэнт

23 студзеня, Позірк. Сярэдні аб’ём трафіку на аднаго абанента беларускай мабільнай сувязі складае 16 Гб у месяц, паведаміў дзяржаўным СМІ 23 студзеня міністр сувязі і інфарматызацыі Кірыл Залескі.

Паводле яго, “пачатковы аб’ём даных” (30 Гб у месяц), што ўстанаўліваецца ведамствам з 22 лютага на безлімітных тарыфных планах, пасля дасягнення якога хуткасць перадачы даных будзе зніжацца, закране не больш за 15% абанентаў.

“Калі вы або вашы дзеці-падлеткі спажываеце 40, 50 ці 60 Гб у месяц і гэта даволі часта здараецца, варта задумацца, што гэта за трафік і якога зместу кантэнт, — лічыць Залескі. — Я перакананы, што гэта не зробіць сур’ёзнага ўплыву на людзей з пункту гледжання зручнасці карыстання мабільнымі сеткамі. Наадварот, гэта дапаможа разгрузіць нашы сеткі і забяспечыць роўны, зручны доступ для ўсіх абанентаў”.

“Калі паразмаўляць з людзьмі, якія жылі за мяжой, вы даведаецеся, што безлімітны інтэрнэт на высокай хуткасці там звычайна каштуе 50–70 долараў у месяц. У нас жа гэта абыходзіцца прыкладна ў 20–40 рублёў — у залежнасці ад тарыфу і аператара. Падкрэслю: з 2022 года тарыфы на безлімітныя планы не павышаліся і не будуць павышацца ў 2026 годзе”, — дадаў ён.

Пра тое, што на безлімітных тарыфах “пачатковы аб’ём даных”, якія перадаюцца без абмежавання хуткасці абанентам сетак сотавай рухомай электрасувязі, з 22 лютага 2026 года складзе 30 Гб у месяц, стала вядома з абнародаванай 22 студзеня пастановы Міністэрства сувязі і інфарматызацыі № 38 ад 22 снежня 2025 года.

Згодна з дакументам, пры вычарпанні “пачатковага аб’ёму” хуткасць перадачы даных будзе зніжацца да 1 Мбіт/с (да пачатку новага месяца дзеяння тарыфнага плана).

Каб гэтага пазбегнуць, абанент зможа набыць у сотавага аператара “дадатковыя аб’ёмы паслуг перадачы даных або перыяды аказання такіх паслуг”. У гэтым выпадку хуткасць застанецца ранейшай.

Цяпер ні “пачатковы аб’ём” даных, ні тое, як змяняецца хуткасць перадачы даных, на безлімітных планах не ўстаноўлены.

Міністэрства антыманапольнага рэгулявання і гандлю паведаміла 31 снежня мінулага года, што падпісала з аператарамі А1 і МТС пагадненне, згодна з якім тарыфы на мабільную сувязь у 2026 годзе павышацца не будуць.