Белстат: Інвестыцыі ў асноўны капітал у 2025 годзе выраслі на 26,1%

23 студзеня, Позірк. За 2025 год у асноўны капітал Беларусі ўкладзена 56 млрд рублёў — на 26,1% больш, чым у 2024-м (44,4 млрд), сведчаць даныя Нацыянальнага статыстычнага камітэта.

24,8% усяго аб’ёму інвестыцый прыпала на прадпрыемствы Мінскай вобласці (у 2024 годзе яе доля склала 25%). Далей Мінск — 22,5% (21,9%), Гомельская — 12,7% (12,5%), Брэсцкая вобласць — 12,6% (13%), Гродзенская — 9,7% (9,8%), Віцебская — 9,1% (8,8%), Магілёўская — 8,6% (9%).

У асноўны капітал прыватных кампаній укладзена 53,8% (52,8%) агульнага аб’ёму інвестыцый, дзяржаўных прадпрыемстваў — 39,9% (42,1%), замежных — 6,3% (5,1%).

У тэхналагічнай структуры лідарам стала сфера будаўніча-мантажных работ, на якую прыйшлося 49% (48,4%) інвестыцый. 38,2% (40,4%) укладанняў звязана з катэгорыяй “Машыны, абсталяванне, транспартныя сродкі”.

Раней паведамлялася, што крэдыторская запазычанасць (запазычанасці прадпрыемства) на 1 снежня 2025 года дасягнула 120 млрд рублёў (94,2 млрд; +27,4%), у тым ліку пратэрмінаваная — 12,4 млрд (10,5 млрд; +18,1%).

Запазычанасць па рублёвых і валютных крэдытах, выдадзеных банкамі юрыдычным асобам, на 1 снежня 2025 года склала 64 млрд 252,9 млн рублёў.

Праведзены “Позіркам“ аналіз паказаў, што актуальная сума запазычанасці на 10,4% большая, чым было на 1 снежня 2024-га (58 млрд 206,5 млн рублёў), і на 9% большая, чым на 1 студзеня 2025-га (58 млрд 952,8 млн).

25 ліпеня 2025 года Аляксандр Лукашэнка падпісаў указ “Аб узмацненні адказнасці старшыняў райвыканкамаў“, згодна з якім уведзена “асабістая адказнасць“ кіраўнікоў раёнаў за нізкаэфектыўныя сельгасарганізацыі.

Для выхаду неэфектыўных арганізацый на прыбытковую працу аблвыканкамам даручана замацоўваць за старшынямі райвыканкамаў па адной стратнай сельгасарганізацыі, якая за справаздачны год мела найбольшую страту ад рэалізацыі прадукцыі, тавараў (работ, паслуг) і не выканала нарматыў тэхналагічных страт буйной рагатай жывёлы.

Указ таксама дае права старшыні аблвыканкама па ўзгадненні з Лукашэнкам перавесці старшыню райвыканкама на пасаду кіраўніка замацаванай за ім арганізацыі.