У 2025-м у Беларусі пабудавана на 6,1% больш кватэр, чым годам раней

23 студзеня, Позірк. У 2025 годзе арганізацыі ўсіх формаў уласнасці пабудавалі 50,2 тыс. кватэр, што на 6,1% больш, чым у 2024-м (47,3 тыс.).), сведчаць даныя Нацыянальнага статыстычнага камітэта.

Летась у эксплуатацыю ўведзена 4 млн 573,6 тыс. квадратных метраў агульнай плошчы жылля (+4,2%, 4 млн 390,5 тыс.).

У Гомельскай вобласці зафіксаваны рост на 13%, Віцебскай — на 10,4%, Мінску — на 8,7%, Магілёўскай — на 3,6%, Мінскай — на 3,4%; у Брэсцкай — падзенне на 2,9%, Гродзенскай — на 4%.

Для маючых патрэбу ў паляпшэнні жыллёвых умоў за гэты час уведзена 1 млн 490,7 тыс. кв. м (+4,4%, 1 млн 427,2 тыс.), у тым ліку з дзяржпадтрымкай — 810,9 тыс. (-2,5%, 832,1 тыс.).

У сельскіх населеных пунктах уведзена ў эксплуатацыю 1 млн 648,4 тыс. кв. м жылля (+4,6%, 1 млн 575,4 тыс.).

У адпаведнасці з заданнем урада, летась у Беларусі павінны былі пабудаваць 4,5 млн кв. м жылля. Такім чынам, паводле афіцыйных звестак, план перавыкананы на 1,6%.

У 2026 годзе з дзяржаўнай падтрымкай павінна быць пабудавана 238,3 тыс. кв. м жылля раводле пастановы Савета міністраў, аб падпісанні якой 6 студзеня паведаміла прэс-служба ўрада.

Дакументам устаноўленыя заданні па будаўніцтве жылля па дзяржаўнай замовеказе — 407,4 тыс. кв. м; арэнднага жылля — 650 тыс. кв. м; жылля, у якім для ацяплення, гарачага водазабеспячэння і прыгатавання ежы выкарыстоўваецца электраэнергія — 315 тыс. кв. м; жылых памяшканняў сацыяльнага карыстання — 22,9 тыс. кв. м.

Акрамя таго, пастанова прадугледжвае, што 5,93 тыс. шматдзетных сем’яў павінны быць забяспечаны жыллём у адпаведнасці з патрабаваннем аб накіраванні такіх сем’яў на паляпшэнне жыллёвых умоў на працягу аднаго года з дня пастаноўкі на ўлік у якасці маючых патрэбу.

Чакаецца, што на будаўніцтва інфраструктуры да жылля будзе выдзелена 1 млрд 341 млн 908 тыс. рублёў.

Будаўніцтва арэнднага жылля ўваходзіць у пяцёрку галоўных прыярытэтаў урада на 2026-2030 гады. Як раней заяўляў міністр эканомікі Юрый Чабатар, па арэндным жыллі ўся заканадаўчая база створана: “Людзі ведаюць, на якіх падставах, на якіх правілах можна будзе [яго] выкупіць. Адпаведны ўказ прыняты. Указ прыняты і аб тым, на якіх умовах прадпрыемствы будуць крэдытавацца для стварэння свайго арэнднага жыллёвага фонду“.

У 2023 годзе пры заданні ў 4,3 млн кв. м пабудавана 4 млн 195 тыс. 92 кв. м жылля (97,6%), у 2022-м — заданне складала 4,2 млн кв. м, факт — 4 млн 222 тыс. 619 (100,5%).