Памерла ўдава Васіля Быкава, ёй было 99 гадоў

21 студзеня, Позірк. Аб смерці Ірыны Быкавай — ўдавы класіка беларускай літаратуры Васіля Быкава — паведаміў у сваім телеграм-канале 21 студзеня публіцыст Сяргей Навумчык.

Ірыне Быкавай было 99 гадоў.

У канцы снежня 2025 года СМІ паведамлялі аб яе шпіталізацыі ў Мінску з інфарктам і пераломам сцягна.

Васіль Быкаў памёр 22 чэрвеня 2003-га на 80-м годзе жыцця.

Быкаў, які прайшоў вайну, крытыкаваў рэжым Лукашэнкі, быў адным з заснавальнікаў Беларускага народнага фронту (1988), даверанай асобай лідара парламенцкай апазіцыі Зянона Пазьняка на першых прэзідэнцкіх выбарах (1994). З 1998 года жыў у эміграцыі, часам вяртаючыся дадому. Памёр у 2003 годзе ва ўзросце 79 гадоў.

Аляксандр Лукашэнка называў Быкава “рупарам і ідэолагам Пазьняка і Шушкевіча ў прэзідэнцкіх выбарах“, “неадназначным чалавекам“, для якога ён “дастаткова зрабіў да смерці”. (Станіслаў Шушкевіч — спікер Вярхоўнага Савета 12-га склікання ў 1991–94 гадах, кандыдат у прэзідэнты на выбарах-94, жорсткі апанент Лукашэнкі, памёр у 2022 годзе.) Шырока вядомай стала заява Лукашэнкі, што ён вырас на вершах празаіка Быкава.