Полк Каліноўскага паведаміў пра гібель добраахвотніка Аляксея Лазарава

21 студзеня, Позірк. Пра гібель беларускага добраахвотніка Аляксея Лазарава (пазыўны “Вуж”) паведаміў 21 студзеня полк імя Кастуся Каліноўскага (ПКК).

Загінулы добраахвотнік “быў адным з першых беларусаў, хто стаў на абарону Украіны пасля пачатку поўнамаштабнага ўварвання”, гаворыцца ў паведамленні. Яго баявы шлях пачаўся ў першай беларускай роце, якая “стала асновай палка Каліноўскага”.

ПКК адзначыў, што “Вуж” удзельнічаў у баях за Кіеў, кампаніі па вызваленні Херсонскай і Мікалаеўскай абласцей, бітвах на Луганскім і Данецкім напрамках, працаваў у многіх гарачых кропках на лініі фронту. Лазараў загінуў, ваюючы ў шэрагах 225-га асобнага штурмавога батальёна.

У мужчыны засталася жонка Вераніка, якую ПКК прапануе падтрымаць.

9 сакавіка 2022 года, неўзабаве пасля пачатку поўнамаштабнай расійскай агрэсіі супраць Украіны, беларускія добраахвотнікі стварылі батальён імя Кастуся Каліноўскага. 26 сакавіка таго ж года ён увайшоў у склад Узброеных сіл Украіны, а 21 траўня было абвешчана аб яго трансфармацыі ў полк.

У Беларусі па факце стварэння палка Каліноўскага распачалі крымінальную справу. Міністэрства ўнутраных спраў прызнала ПКК “экстрэмісцкім фарміраваннем” (першапачаткова — у верасні 2022 года, дадаткова — у красавіку 2024-га). 25 верасня 2024 года стала вядома, што Вярхоўны суд прызнаў ПКК “тэрарыстычнай арганізацыяй”. У адказ на гэта полк заявіў, што прызнае “тэрарыстычнай арганізацыяй” рэжым Аляксандра Лукашэнкі. Улады ў Мінску жорстка пераследуюць за любую дапамогу гэтай структуры і нават намер яе аказаць, жаданне ўступіць у полк.

На баку Украіны ваюе яшчэ некалькі беларускіх добраахвотніцкіх фарміраванняў.

 У лістападзе мінулага года кіраўніца місіі дэмакратычных сіл у Кіеве Святлана Шаціліна паведаміла, што ў баях супраць Расіі загінула “каля сотні” беларусаў.

Дакладных звестак аб колькасці загінулых ва Украіне беларускіх добраахвотнікаў няма. Раней СМІ паведамлялі, што ў баях супраць РФ загінула каля 70 беларусаў.