Экс-міністр працы Паўлючэнка ўзначаліла ў Савеце Рэспублікі камісію па адукацыі, навуцы, культуры і сацразвіццю

21 студзеня, Позірк. Былы міністр працы і сацыяльнай абароны Наталля Паўлючэнка аднагалосна абраная старшынёй пастаяннай камісіі па адукацыі, навуцы, культуры і сацыяльным развіцці Савета Рэспублікі Нацыянальнага сходу, паведамляе яго прэс-служба.

Паўлючэнка прызначаная членам Савета Рэспублікі указам Аляксандра Лукашэнкі №14 ад 15 студзеня.

Чыноўніца нарадзілася ў 1977 годзе ў Жодзіне (Мінская вобласць). У 1998 годзе скончыла Беларускі камерцыйны ўніверсітэт кіравання па спецыяльнасці “фінансы і крэдыт”.

Да пасады кіраўніка ведамства займала ў 2021–2024 гадах пасаду першага намесніка міністра, а да гэтага ўзначальвала Фонд сацыяльнай абароны насельніцтва.

Верхняя палата беларускага парламента складаецца з 64 членаў (па восем чалавек ад кожнай вобласці і сталіцы), а таксама Лукашэнкі.

15 студзеня міністрам працы і сацыяльнай абароны прызначаны былы намеснік старшыні Камітэта дзяржкантролю, які раней працаваў у Мінпрацы на пасадзе намесніка міністра, Андрэй Лабовіч (1978 года нараджэння).