Лукашэнка разлічвае з дапамогай “Савета міру” Трампа “паўплываць на кіраўніцтва ўкраінскае” і “наблізіць” заканчэнне вайны

20 студзеня, Позірк. Далучэнне Беларусі да “Савета міру” важнае з пункту гледжання магчымасцяў арганізацыі, якая ствараецца прэзідэнтам ЗША Дональдам Трампам. Пра гэта 20 студзеня заявіў Аляксандр Лукашэнка.

“Мяне вабіць тое, што гэты “Савет міру”, яго дзеянні, магчымасці могуць распаўсюдзіцца на іншыя часткі планеты. Перш за ўсё, можа быць, і Украіне мы дапаможам, зможам наблізіць мір, зможам паўплываць на кіраўніцтва ўкраінскае. Вось гэта мяне больш за ўсё вабіць, а не тое, што мы ўжо моцна дапаможам Газе. Я ведаю свае магчымасці і магчымасці Беларусі”, — цытуе Лукашэнку яго прэс-служба.

Ён таксама пракаментаваў інфармацыю СМІ пра тое, што пастаяннае членства ў “Савеце міру” будзе магчымым пры выплаце ўнёску ў памеры 1 млрд долараў.

“Мільярд патрэбны, калі ты праз тры гады захочаш працаваць. Але ёсць яшчэ ўмова: калі будзеш добра працаваць, супрацоўнічаць дзеля міру, то і без мільярда можаш далей працаваць. Я арыентуюся на другое”, — сказаў на гэта Лукашэнка.

Раней 20 студзеня ён падпісаў дакумент аб далучэнні Беларусі да “Савета міру”.

Адзначалася, што Лукашэнка зрабіў гэта “ў поўнай адпаведнасці з прадугледжанай працэдурай, якая была абазначана ў лісце прэзідэнта ЗША Дональда Трампа”.

20 студзеня стала вядома, што Украіна атрымала запрашэнне далучыцца да “Савета міру”. Разам з тым прэзідэнт краіны Уладзімір Зяленскі заявіў, што не ўяўляе, як Кіеў будзе супрацоўнічаць у адным органе з Беларуссю і Расіяй.

“Расія — наш вораг, Беларусь — іх саюзнік, — сказаў ён. — Пакуль што для мяне вельмі складана ўявіць, як мы з Расіяй можам быць разам у тым ці іншым савеце. І гэта не адносіцца да гэтага “Савета міру”. Проста Расія — гэта пра “Савет вайны”. І Беларусь разам з імі, а менавіта рэжым Лукашэнкі”.

Напярэдадні прэс-сакратар Міністэрства замежных спраў Руслан Варанкоў паведаміў, што на адрас Лукашэнкі паступіў асабісты зварот Трампа, у якім Мінску “ў кантэксце ўрэгулявання сітуацыі ў Газе прапануецца стаць заснавальнікам Савета міру — новай міжнароднай арганізацыі”.

“Мы высока цэнім, што амерыканскі бок бачыць Беларусь, і гэта прама абазначана ў тэксце звароту, як дзяржаву, гатовую ўзяць на сябе высакародную адказнасць за пабудову трывалага міру, і весці за сабой сілай прыкладу, інвеставаць у бяспечную і квітнеючую будучыню для будучых пакаленняў”, — адзначыў прадстаўнік МЗС.

Прапанову, паводле яго слоў, разглядаюць у Мінску “як прызнанне асабістых заслуг і міжнароднага аўтарытэту кіраўніка беларускай дзяржавы”.

Паводле інфармацыі Варанкова, аб прапанове было дакладзена Лукашэнку, яна “ўспрынята ім станоўча”.

15 студзеня Трамп абвясціў аб фарміраванні “Савета міру”, які будзе кіраваць аднаўленнем сектара Газа. Стварэнне гэтай структуры ўваходзіць у мірны план амерыканскага лідара для Газы разам з размяшчэннем міжнародных сіл.

Ачоліць орган сам прэзідэнт ЗША. Было заяўлена, што ў яго заснавальніцкі выканаўчы савет, акрамя самога Трампа, увойдуць дзяржаўны сакратар ЗША Марка Рубіа, спецпрадстаўнік ЗША па Блізкім Усходзе Стывен Уіткаф, зяць Трампа Джарэд Кушнер, былы прэм’ер Вялікабрытаніі Тоні Блэр, намеснік дарадцы па нацыянальнай бяспецы ЗША Роберт Гэбрыел, кіраўнік Сусветнага банка Аджай Бангка і інвестар Марк Роўэн.

Паводле інфармацыі заходніх СМІ, ЗША запрасілі далучыцца да “Савета міру” больш за 50 дзяржаў.