Па ўсёй Беларусі правялі трэніроўкі па выдачы рэзерву лекаў і медвырабаў
16 студзеня, Позірк. На даручэнне Міністэрства аховы здароўя ва ўсіх рэгіёнах Беларусі правялі трэніроўкі па выдачы галіновага рэзерву лекавых сродкаў і медыцынскіх вырабаў.
Паводле інфармацыі прэс-службы ведамства, такія трэніроўкі неабходныя для “аператыўнага рэагавання галіновай падсістэмы дзяржаўнай сістэмы па надзвычайных сітуацыях (ДСНС) на надзвычайныя сітуацыі прыроднага або тэхнагеннага характару”.
У выніку “быў адпрацаваны дакладны парадак узаемадзеяння па выдачы лекавых прэпаратаў з галіновага рэзерву”: прыём і апрацоўка заяўкі ад установы аховы здароўя, камплектацыя неабходных лекавых сродкаў на аптэчным складзе, арганізацыя іх адгрузкі і транспартавання.
Сцвярджаецца, што вучэнні “дазволілі праверыць зладжанасць працы ўсіх звёнаў, мінімізаваць час рэагавання і гарантаваць своечасовае забеспячэнне насельніцтва жыццёва важнымі медыкаментамі ў любой сітуацыі”.
Раней пра такія трэніроўкі Мінздароўя не паведамляла.
