На фоне моцных маразоў суседнія краіны ЕС шосты дзень не фіксуюць актыўнасці мігрантаў на мяжы з Беларуссю

Апублікавана на адкрытай версіі “Позірку” 16 студзеня 2026 года ў 20:08

16 студзеня, Позірк. На фоне моцных маразоў суседнія краіны ЕЗ шэсць дзён запар — з 10 студзеня — не фіксуюць актыўнасці нелегальных мігрантаў на сваіх межах з Беларуссю, сведчыць праведзены “Позіркам“ аналіз аператыўных звестак іх памежных службаў.

Больш працяглы перыяд спакою назіраўся амаль два гады таму, з 27 студзеня па 3 лютага 2024-га (8 дзён).

За 15 дзён студзеня 2026 года адзначана 24 спробы незаконнага пераходу з Беларусі ў ЕС (у Літву — 13, у Польшчу — 11). Гэта ў 6 разоў менш, чым за той жа перыяд 2025 года (144 спробы: у Польшчу — 113, Літву — 16, Латвію — 15), у 2,5 раза менш, чым за 15 дзён студзеня 2024 года (61: у Польшчу — 52, Латвію — 5, Літву — 4), і ў 44,8 раза менш, чым за той жа перыяд 2023 года (1.076: у Польшчу — 683, Латвію — 261, Літву — 132).

Тры гады таму на пачатку студзеня ў Беларусі было анамальна цёплае надвор’е, найбольш высокія тэмпературы (да плюс 15-16 градусаў) адзначаліся на захадзе, каля мяжы з Польшчай.

За 2025 год суседнія краіны Еўрасаюза, як паказаў праведзены “Позіркам“ аналіз звестак іх памежных службаў, прадухілілі 42.714 спробаў мігрантаў незаконна перасекчы мяжу з беларускай тэрыторыі. Гэта на 17,7% больш, чым у 2024 годзе, і на 1,5% больш, чым у 2023-м.