Рассельгаснагляд не прапусціў у РФ амаль 7 тон салатаў з Беларусі

16 студзеня, Позірк. Аб забароне ўвозу на тэрыторыю Расіі партыі салатаў з Беларусі паведаміла Федэральная служба па ветэрынарным і фітасанітарным наглядзе (Рассельгаснагляд).

“Падчас кантролю імпартнай расліннай прадукцыі, якая ўвозіцца на тэрыторыю РФ, выяўленыя ў партыі салатаў турэцкага паходжання каранцінныя насякомыя-шкоднікі. Дадзеная прадукцыя агульнай вагой каля 6,8 тоны перамяшчалася з Беларусі ў адрас атрымальнікаў з Масквы”, — адзначаецца ў рэлізе.

Лабараторныя даследаванні узораў прадукцыі пацвердзілі наяўнасць у салатах каранціннага для РФ заходняга кветкавага трыпса.

6 студзеня паведамлялася, што супрацоўнікамі ведамства на расійскую тэрыторыю не былі прапушчаныя 24 галавы буйной рагатай жывёлы з Беларусі — у перавозчыка “адсутнічалі ветэрынарныя суправаджальныя дакументы, якія пацвярджаюць клінічнае здароўе і эпізаатычны дабрабыт мясцовасці вывазу жывёлы”. Пасля разбору статак вернуты на беларускую тэрыторыю.

Раней Рассельгаснагляд паведамляў, што з пачатку 2025 года (на 26 снежня) з Бранскай вобласці ў Беларусь было вернута больш за 28 тон жывёлагадоўчай прадукцыі, якая перамяшчалася без неабходных дакументаў, у тым ліку абыходзячы афіцыйныя пункты ветэрынарнага кантролю.