У Літве перахопленая чарговая партыя кантрабандных цыгарэт, якія перапраўляліся з Беларусі па Нёмане
15 студзеня, Позірк. Пра перахоп у ноч на 15 студзеня ў памежнай рацэ Нёман (літоўская назва — Нямунас) двух плытоў з беларускімі кантрабанднымі цыгарэтамі паведаміла Служба аховы дзяржаўнай мяжы (САДМ) Літвы.
Паводле інфармацыі ведамства, памежнікі Друскінінкайскай заставы пасля атрымання інфармацыі ад калег, якія нясуць службу вышэй па плыні Нёмана, перахапілі два скруткі, абгорнутыя празрыстай поліэтыленавай плёнкай і замаскаваныя лёдам і снегам.
У абодвух было знойдзена па 1.400 пачкаў цыгарэт NZ Gold з беларускімі акцызнымі маркамі. Кошт тытунёвых вырабаў з улікам усіх абавязковых да выплаты ў Літве падаткаў — 14.532 еўра.
Па факце “парушэння парадку набыцця і перавозкі падакцызных тавараў” распачатая адміністрацыйная вытворчасць, праводзіцца расследаванне. Выяўленыя цыгарэты часова захоўваюцца на заставе як “безгаспадарная маёмасць”.
6 студзеня САДМ паведамляла, што з Нёмана быў вылаўлены плыт з 640 пачкамі беларускіх цыгарэт Minsk Capital QS.
Паводле звестак ведамства, у 2025 годзе знізілася інтэнсіўнасць сплаву беларускіх цыгарэт па прыгранічных рэках з дапамогай плытоў або розных канструкцый, аснашчаных GPS-абсталяваннем. За год зафіксавана 32 спробы такой кантрабанды, на ваду было спушчана больш за 107 тыс. пачкаў тытунёвых вырабаў.
