У 2025 годзе МАЗ нязначна знізіў продажы новых аўтобусаў у Расіі
13 студзеня, Позірк. У снежні 2025 года на расійскім рынку рэалізавана 158 новых аўтобусаў вытворчасці Мінскага аўтамабільнага завода — на 42,3% больш, чым годам раней (111), сведчаць прааналізаваныя “Позіркам” даныя агенцтва “АСМ-холдынг” (РФ).
Больш за ўсё аўтобусаў у мінулым месяцы паставілі расійскія вытворцы ПАЗ — 1.111 (+20,2%), НефАЗ — 309 (рост у 2,6 разы) і ЛіАЗ — 185 (-53%).
За 2025 год на рынку РФ рэалізавана 499 аўтобусаў МАЗ (у 2024-м — 504; -1%).
Лідарамі продажаў летась былі аўтобусы ПАЗ (6.006; -26%), YUTONG (1.302; -41,2%), ЛіАЗ (1.079; -62,7%).
Буйныя прамысловыя прадпрыемствы — БелАЗ, БМЗ, МТЗ, МАЗ, а таксама канцэрны “Белнафтахім” і “Беллеспаперапрам” — не выканалі заданні па пастаўках прадукцыі ў Расію. Пра гэта, паводле паведамлення беларускай амбасады ў Маскве, ішла размова 10 верасня 2025 года на пасяджэнні міжведамаснай рабочай групы па ажыццяўленні маніторынгу сітуацыі з пастаўкамі ў РФ.
Беларускія аўтобусы рэгулярна загараюцца падчас руху ў РФ і Беларусі, прычынай гэтага называюцца санкцыі, уведзеныя супраць МАЗа дэмакратычнымі краінамі, якія пазбавілі яго часткі якасных камплектуючых.
Апошні падобны выпадак, пра які пісалі СМІ, быў зафіксаваны ў Самары 9 кастрычніка 2025 года. Да гэтага аўтобусы гарэлі: 5 ліпеня — у Іркуцку, 14 траўня — у Варонежскай вобласці, 5 красавіка — у Санкт-Пецярбургу, 23 сакавіка — у Кіраве, 13 студзеня — у Ліпецку.
