13 студзеня, Позірк. Супрацоўнікі крымінальнай выведкі Службы аховы дзяржаўнай мяжы (САДМ) пры МУС Літвы 12 студзеня затрымалі шэсць чалавек, якія, як мяркуецца, з’яўляюцца членамі арганізаванай групы, звязанымі з кантрабандай з Беларусі з дапамогай паветраных шароў.
13 студзеня САДМ паведаміла, што падчас вобшукаў у дамах і транспартных сродках падазраваных знойдзена і вынята 7,5 тыс. пачкаў беларускіх цыгарэт, наяўныя сродкі, SIM-карты мабільных аператараў Літвы і Беларусі, а таксама мабільныя тэлефоны. Пасля агляду вынятыя два аўтамабілі.
Затрыманых жыхароў Вільнюса, Вільнюскага і Шальчынінкскага раёнаў (узрост ад 25 да 46 гадоў) змясцілі ў ізалятар часовага ўтрымання. У найбліжэйшы час вырашыцца пытанне пра прымяненне да іх мер стрымання.
САДМ паведаміла, што ад пачатку 2026 года перахоплена сем паветраных шароў, з дапамогай якіх з Беларусі перапраўлялі нелегальныя тытунёвыя вырабы. На склады памежнікаў трапіла 24 тыс. пачкаў цыгарэт.
Пра перахоп першай у гэтым годзе партыі кантрабандных цыгарэт, дастаўленых з Беларусі з дапамогай двух паветраных шароў, паведамлялася 6 студзеня. Такім чынам, за тыдзень перахоплена яшчэ пяць аэрастатаў.
Ведамства нагадала, што ў 2025 годзе было перахоплена 635 партый тытунёвых вырабаў, якія перапраўляліся з Беларусі ў Літву з дапамогай паветраных шароў; прымусова пасаджана 59 кантрабандысцкіх дронаў. Агулам летась памежнікі канфіскавалі 1,6 млн пачкаў цыгарэт, якія кантрабандысты перапраўлялі ў Літву дронамі і аэрастатамі.
Акрамя таго, у 2025 годзе супрацоўнікі САДМ затрымалі 171 чалавека, як мяркуецца, датычнага да кантрабанды паветраным шляхам.
Летась напрыканцы кастрычніка Вільнюс закрыў пункты пропуску Мядзінінкай (з беларускага боку — Каменны Лог) і Шальчынінкай (Беняконі), дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.
Пагранпераходы аднавілі працу 20 лістапада. За тры тыдні, пакуль яны былі закрытыя, рэжым Аляксандра Лукашэнкі паспеў пастрожыць правілы знаходжання ў краіне літоўскага грузавога транспарту, увязаўшы іх з працай пунктаў пропуску. Паведамлялася, што ў Беларусі захрасла каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай мяжы.
Апошні раз абмежаванне паветранай прасторы над аэрапортам Вільнюса ў сувязі з уварваннем у паветраную прастору метэазондаў з кантрабанднай беларускай тытунёвай прадукцыі ўводзілася летась 6 снежня. З 9 снежня ў краіне абвешчаны рэжым экстрэмальнай сітуацыі.
