Першая ў 2026 годзе праверка сістэмы апавяшчэння жыхароў Брэсцкай вобласці пройдзе 13 студзеня

13 студзеня, Позірк. Чарговая планавая тэхнічная праверка сістэмы апавяшчэння насельніцтва адбудзецца 13 студзеня ў Брэсцкай вобласці, паведаміла Міністэрства па надзвычайных сітуацыях.

Адзначаецца, што ў рамках праверкі, якая пройдзе з 12:00 да 13:00, будуць уключацца электрасірэны.

МНС традыцыйна просіць грамадзян захоўваць спакой, падкрэсліваючы, што “ніякіх дзеянняў не патрабуецца”.

У Брэсцкай вобласці, якая мяжуе з Украінай і Польшчай, праверка сістэмы апавяшчэння насельніцтва праводзіцца часцей за ўсё. У 2025 годзе гэта адбывалася сама меней 16 разоў: 22 снежня, 9 снежня, 25 і 11 лістапада, 28 і 14 кастрычніка, 23 і 9 верасня, 12 жніўня, 21 і 8 ліпеня, 30 і 10 чэрвеня, 27 траўня, 22 і 8 красавіка.

У Гомельскай вобласці, што мяжуе з Украінай і Расіяй, праверкі летась праходзілі 16 снежня, 14–16 кастрычніка, 18 верасня, 21 жніўня, 17 ліпеня, 19 чэрвеня, 20 сакавіка і 30 студзеня; у Віцебскай — 2 снежня і 17 чэрвеня, у Гродзенскай — 25 верасня, у Мінскай — 10 верасня, 13 жніўня, 11 чэрвеня і 16 красавіка, у Магілёўскай — 18 верасня, у самім Магілёве сістэма тэставалася 15–17 красавіка.

13 сакавіка 2025 года планавая праверка сістэмы апавяшчэння прайшла па ўсёй Беларусі.

Такім чынам, праверкі па-ранейшаму часцей за ўсё праводзяцца ў абласцях, якія мяжуюць з Украінай, куды раней урываліся беспілотныя лятучыя апараты, якія, як мяркуецца, належаць Расіі.

У Беларусі зафіксавана некалькі выпадкаў падзення дронаў на будынкі (у тым ліку ў Мінску), аднак інфармацыі пра тое, што пры гэтым актывавалася сістэма апавяшчэння, няма.

Ад пачатку поўнамаштабнай вайны РФ супраць Украіны праверкі сістэм апавяшчэння сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.