За тыдзень Беларусь у бязвізавым парадку наведала менш за 2 тыс. еўрапейцаў

12 студзеня, Позірк. З 5 па 12 студзеня ў бязвізавым парадку ў Беларусь уехала 1.998 грамадзян еўрапейскіх дзяржаў (тыднем раней — 3.097), сведчыць праведзены “Позіркам” аналіз даных Дзяржаўнага пагранічнага камітэта.

За апошні тыдзень у Беларусь прыбыло 643 грамадзяніны Літвы (991 тыднем раней), 619 грамадзян і неграмадзян Латвіі (934), 396 грамадзян Польшчы (551), 340 грамадзян іншых еўрапейскіх дзяржаў са спісу пашыранага бязвізу (621).

Агулам з 15 красавіка 2022 года Беларусь наведала 1.261.422 жыхары Еўропы. З Латвіі прыбыло 405.848 чалавек, з Літвы — 663.648, з Польшчы — 133.236. У рамках пашыранага бязвізу для 35 еўрапейскіх дзяржаў з 19 ліпеня 2024 года ў Беларусь заехала 58.690 чалавек.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

9 снежня 2025 года Аляксандр Лукашэнка падоўжыў бязвізавы ўезд для грамадзян 38 еўрапейскіх краін да 31 снежня 2026 года ўключна.

Пашыраны бязвіз тычыцца жыхароў Андоры, Аўстрыі, Бельгіі, Балгарыі, Босніі і Герцагавіны, Ватыкана, Венгрыі, Вялікабрытаніі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Люксембурга, Ліхтэнштэйна, Мальты, Манака, Нарвегіі, Нідэрландаў, Партугаліі, Паўночнай Македоніі, Румыніі, Сан-Марына, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.