Каля 2,5 тыс. энергетыкаў гатова да ліквідацыі патэнцыйных наступстваў халадоў, што цяпер рушаць — Мінэнерга

12 студзеня, Позірк. На фоне халадоў, якія цяпер рушаць, энергазабеспячальныя арганізацыі Беларусі пераведзеныя ў рэжым падвышанай гатоўнасці, вынікае з паведамлення прэс-службы Міністэрства энергетыкі.

Ведамства звярнула ўвагу на тое, што “з 12 студзеня ў Беларусь чакаецца паступленне халодных арктычных паветраных мас з поўначы Еўропы і паніжэнне тэмпературнага фону”. “У начныя гадзіны тэмпература паветра будзе паніжацца да 15–24 градусаў [марозу], месцамі прагназуецца да 28 градусаў ніжэй за нуль”, — гаворыцца ў паведамленні.

У сувязі з гэтым, адзначыла Мінэнерга, “узмоцнены кантроль за працай абсталявання падстанцый і лініямі электраперадачы, падрыхтаваныя рэзервовыя крыніцы электразабеспячэння”.

“Да ліквідацыі магчымых тэхналагічных парушэнняў гатовыя 673 аварыйна-аднаўленчыя брыгады агульнай колькасцю каля 2,5 тыс. чалавек. Яны ўкамплектаваныя неабходнымі сродкамі абароны, інструментамі, спецтэхнікай”, — запэўніла міністэрства.

Паводле інфармацыі дзяржоргана, у цепласетках падвышаная тэмпература — для “падтрымання камфортнага тэмпературнага рэжыму ў жылфондзе ва ўмовах моцных маразоў”.

“Рэгуляванне цяпла, якое адпускаецца, забяспечваецца за кошт змянення тэмпературы цепланосбіта і яго аб’ёму з улікам кароткатэрміновых прагнозаў надвор’я ў кожным рэгіёне. Вядзецца пастаянны маніторынг за працай цеплавых сетак, павялічаная колькасць іх абходаў. Наладжанае пастаяннае ўзаемадзеянне з падраздзяленнямі МНС, мясцовымі органамі ўлады, службамі Белгідрамета”, — гаворыцца ў паведамленні.